വീട്ടിലേയ്ക്കുള്ള ഇടവഴിലൂടെ നടന്നുപോകുന്നതിനിടെ കുഴഞ്ഞുവീണ വീട്ടമ്മയുടെ താലിമാലയും കൈവളകളുമടങ്ങിയ ആറര പവന്റെ സ്വർണാഭരണങ്ങൾ കവർന്ന് പകരം മുക്കുമാല അണിയിച്ച് തട്ടിപ്പ് നടത്തിയെന്ന പരാതിയിൽ പൊലീസ് കേസെടുത്ത് അന്വേഷണം തുടങ്ങി. വിളവൂർക്കൽ പൊറ്റയിൽ തിരുവാതിരയിൽ എസ്.കെ. വേണുകുമാരന്റെ ഭാര്യ സതികുമാരിയുടെ (41)നാലര പവന്റെ താലിമാലയും രണ്ട് പവന്റെ വളയുമാണ് നഷ്ടപ്പെട്ടത്. വെള്ളിയാഴ്ച ഉച്ചയ്ക്ക് മലയിൻകീഴ് ജംഗ്ഷനു സമീപത്തെ ഇടറോഡിലായിരുന്നു സംഭവം.

കാട്ടാക്കടയിലെ തയ്യൽ ക്ലാസിൽ പോയ സതികുമാരിക്ക് അവിടെ വച്ച് അസ്വസ്ഥത അനുഭവപ്പെട്ടു. വീട്ടിലേക്ക് മടങ്ങാൻ ബസിൽ കയറി. അസുഖം മൂർച്ഛിക്കുമെന്ന് തോന്നിയപ്പോൾ ഭർത്താവ് വേണുകുമാരനെ ഫോണിൽ വിളിച്ചു. ഉച്ചയ്ക്ക് 12 മണിയോടെ മലയിൻകീഴ് മാർക്കറ്റ് ജംഗ്ഷന് അടുത്തുള്ള വേണുകുമാരന്റെ അനുജന്റെ വീട്ടിൽ താനെത്തുമെന്ന് സതികുമാരി അറിയിച്ചു. മാർക്കറ്റ് ജംഗ്ഷന് സമീപം ബസ് ഇറങ്ങിയപ്പോഴേക്കും സതികുമാരി അവശയായിരുന്നു. അനുജന്റെ വീട്ടിലേക്ക് നടന്നു പോകുന്നതിനിടെ ഇടറോഡിൽ (വില്ലേജ് ഓഫീസ് റോഡ്) കുഴഞ്ഞുവീണു. ഈ സമയം നാട്ടുകാരിൽ ചിലർ അടുത്തെത്തി മുഖത്ത് വെള്ളം തളിക്കുകയും മറ്റും ചെയ്തു.

ഇതിനിടെ സതികുമാരിയുടെ ബന്ധുക്കളും സ്ഥലത്തെത്തി. അവർ ഉടൻ തന്നെ സതികുമാരിയെ സ്വകാര്യ ആശുപത്രിയിലെത്തിച്ചു. ശരീരത്തിലെ പഞ്ചസാരയുടെ അളവ് ക്രമാതീതമായി കുറഞ്ഞതാണ് ബോധം നഷ്ടപ്പെടാൻ കാരണം. എക്സ് സർവീസ്കാരനും ഇപ്പോൾ ജില്ലാ സഹകരണബാങ്കിലെ ടെലഫോൺ ഓപ്പറേറ്ററുമായ ഭർത്താവ് വേണുകുമാരനും ഇതിനിടെ ആശുപത്രിയിൽ എത്തി.

വൈകിട്ട് ആശുപത്രിയിൽ നിന്ന് വീട്ടിൽ തിരിച്ചെത്തിയപ്പോഴാണ് സതികുമാരി മാല ശ്രദ്ധിക്കുന്നത്. സ്വർണമാലയ്ക്ക് പകരം മുക്കുപണ്ടമാണെന്ന് മനസിലായി. കൈയിലെ വളയും കാണാനില്ലായിരുന്നു. തുടർന്ന് വേണുകുമാരൻ മലയിൻകീഴ് പൊലീസ് സ്റ്റേഷനിൽ പരാതി നൽകി. ഇന്നലെ പൊലീസ് വീട്ടിലെത്തി മൊഴിയെടുത്ത ശേഷം കേസ് രജിസ്റ്റർ ചെയ്തു.

സതികുമാരി വഴിയിൽ ബോധരഹിതയായി കിടന്ന സമയത്ത് എത്തിയ ആരെങ്കിലും മാലയും വളയും അപഹരിച്ച ശേഷം മുക്കുമാല കഴുത്തിൽ ഇട്ടതാവാം എന്നാണ് സംശയിക്കുന്നത്. മലയിൻകീഴ് മാർക്കറ്റ് ജംഗ്ഷനിൽ സതികുമാരി ബസ് ഇറങ്ങുന്നതും റോഡിലൂടെ നടന്ന് പോകുന്നതും സമീപത്തെ സഹകരണ ബാങ്കിലെയും സ്വകാര്യ ധനകാര്യ സ്ഥാപനത്തിലെയും സി സി. ടി.വി കാമറയിൽ നിന്ന് അറിയാനാകുമെന്നാണ് പൊലീസ് പ്രതീക്ഷിക്കുന്നത്. എസ്.ഐ.സുരേഷ് കുമാറിന്റെ നേതൃത്വത്തിൽ സി.സി. ടി.വി ദൃശ്യങ്ങൾ പരിശോധിച്ചു വരുന്നു.