കണ്ണിലൂടെ തലച്ചോറിനുള്ളില് തുളച്ചു കയറിയ ശിഖരം ഏഴു മണിക്കൂര് നീണ്ട ശസ്ത്രക്രിയയ്ക്കൊടുവിൽ പുറത്തെടുത്തു
മരം മുറിക്കുന്നതിനിടെ കണ്ണിലൂടെ തലച്ചോറിനുള്ളില് തുളച്ചു കയറിയ ശിഖരം ശസ്ത്രക്രിയയിലൂടെ നീക്കം ചെയ്തു. മാവേലിക്കര സ്വദേശി രാജന് (50) ന്റെ തലയ്ക്കുള്ളില് തുളച്ചു കയറിയ ശിഖരമാണ് ഇന്നലെ കോട്ടയം മെഡിക്കല് കോളജ് ആശുപത്രിയില് ഏഴു മണിക്കൂര് നീണ്ട ശസ്ത്രക്രിയയിലുടെ പുറത്തെടുത്തത്.
മരം വെട്ടുതൊഴിലാളിയായ രാജന് ഞായറാഴ്ച ഉച്ചകഴിഞ്ഞ് 3.30 ഓടെ മരത്തിന് കയറി ശിഖരം മുറിക്കുന്നതിനിടയിലാണ് അപകടത്തില് പെട്ടത്. ചുവടു ദ്രവിച്ച മരം കടപുഴകി വീഴുകയായിരുന്നു . അപകടത്തില് രാജന്റെ വലതുകണ്ണില് മരക്കഷണം കുത്തി ക്കയറി.
കണ്ണിന്റെ പോളയിലൂടെ തുളച്ചുകയറിയ മരക്കഷണം തലയോട്ടിയിലെ എല്ലു പൊട്ടിച്ചു തലച്ചോറിനുള്ളില് കുത്തി കയറിയ നിലയിലായിരുന്നു. രാജനെ ഉടന് ആലപ്പുഴ വണ്ടാനം മെഡിക്കല് കോളജില് എത്തിച്ചു ചികിത്സ തേടി. അവിടെ നിന്നും കോട്ടയം മെഡിക്കല് കോളജിലേയ്ക്കു റഫര് ചെയ്യുകയായിരുന്നു.
ന്യൂറോ സര്ജറി വിഭാഗം മേധാവി ഡോ. പി.കെ ബാലകൃഷ്ണന്റെ നേതൃത്തത്തില് നടന്ന ശസ്ത്രക്രിയയില് ഡോ.ടിനു രവി, ഡോ.വിനു, ഡോ. ഷാജു മാത്യു, ഡോ.ഗിരീഷ്, ഡോ. ഫിലിപ് ഐസക്ക് തുടങ്ങിയവര് പങ്കെടുത്തു.
https://www.facebook.com/Malayalivartha
