രാജസ്ഥാനിലെ അല്‍വാര്‍ ജില്ലയില്‍ ഗോരക്ഷാ പ്രവര്‍ത്തകരുടെ മര്‍ദ്ദനത്തില്‍ മുസ്ലീം വ്യാപാരി കൊല്ലപ്പെട്ട സംഭവത്തില്‍ ഒരാളെ അറസ്റ്റ് ചെയതെന്ന് സംസ്ഥാന ആഭ്യന്തര മന്ത്രി ഗുലാബ് ചന്ദ് കത്തരിയ അറിയിച്ചു. മര്‍ദ്ദനത്തില്‍ രണ്ട് സഹായികള്‍ക്ക് ഗുരുതരമായി പരിക്കേറ്റിരുന്നു. നവംബര്‍ പത്തിന് അല്‍വാര്‍ ജില്ലയിലെ ഫഹാരി സ്വദേശി ഉമ്മര്‍ മുഹമ്മദാണ് ഗോരക്ഷകരുടെ ആക്രമണത്തില്‍ കൊല്ലപ്പെട്ടത്.

ഉമ്മറും രണ്ട് സഹായികളും ഹരിയാനയിലെ മേവതില്‍ നിന്നും രാജസ്ഥാനിലെ ഭാരത്പൂരിലേക്ക് ട്രക്കില്‍ പശുക്കളെ കൊണ്ടു പോകുന്നതിനിടെ ജനക്കൂട്ടം വഴിയില്‍ തടഞ്ഞ് ആക്രമിക്കുകയുമായിരുന്നു. ആക്രമികളില്‍ നിന്നും സഹായികള്‍ ഓടി രക്ഷപ്പെടുകയായിരുന്നു. നിസാര പരിക്കുകളോടെ ഇവര്‍ സമീപത്തെ ആശുപത്രിയില്‍ ചികിത്സയിലാണ്. എട്ടോളം പേര്‍ ചേര്‍ന്ന സംഘമാണ് തങ്ങളെ ആക്രമിച്ചതെന്ന് ഇവര്‍ വ്യക്തമാക്കി.