നിര്‍ണായക കോണ്‍ഗ്രസ് പ്രവര്‍ത്തക സമിതി യോഗം ഇന്ന്
അടുത്ത പാര്‍ട്ടി അധ്യക്ഷനെ തെരഞ്ഞെടുക്കുന്നതിനുള്ള തീയതി ഉള്‍പ്പടെയുള്ള കാര്യങ്ങള്‍ തീരുമാനിക്കാന്‍ കോണ്‍ഗ്രസ് പ്രവര്‍ത്തക സമിതി യോഗം ഇന്നു ചേരും. സംഘടനാ തെരഞ്ഞെടുപ്പ് ഡിസംബര്‍ 31നു മുന്‍പ് പൂര്‍ത്തിയാക്കണമെന്ന തെരഞ്ഞെടുപ്പു കമ്മീഷന്റെ അന്ത്യശാസനം വന്നതോടെയാണു നേതൃമാറ്റം ഉള്‍പ്പടെയുള്ള നടപടികളിലേക്കു കോണ്‍ഗ്രസ് തിരക്കിട്ടു പ്രവേശിക്കുന്നത്.
സംസ്ഥാനതല സംഘടനാ തെരഞ്ഞെടുപ്പുകള്‍ പൂര്‍ത്തിയായതോടെ കോണ്‍ഗ്രസ് ഉപാധ്യക്ഷന്‍ രാഹുല്‍ ഗാന്ധിയെ പാര്‍ട്ടി അധ്യക്ഷനായി അവരോധിക്കുന്നതിനുള്ള തെരഞ്ഞെടുപ്പു പ്രക്രിയ ഇന്നത്തെ പ്രവര്‍ത്തക സമിതി യോഗത്തില്‍ തീരുമാനിക്കും. പിസിസി തെരഞ്ഞെടുപ്പുകള്‍ ഉള്‍പ്പടെ സംഘടനാ തലത്തില്‍ താഴേക്കിടയിലുള്ള നടപടിക്രമങ്ങള്‍ പൂര്‍ത്തിയായ മുറയ്ക്ക് ഇനി പാര്‍ട്ടി പ്രസിഡന്റ് സ്ഥാനത്തേക്കുള്ള തെരഞ്ഞെടുപ്പാണു മുഖ്യം.
പ്രസിഡന്റ് തെരഞ്ഞെടുപ്പിനുള്ള വിജ്ഞാപനം ഇന്നത്തെ പ്രവര്‍ത്തക സമിതി യോഗത്തില്‍ ഉണ്ടാകും. നാമനിര്‍ദേശ പത്രിക നല്‍കേണ്ട സമയം, സൂക്ഷ്മ പരിശോധന, പിന്‍വലിക്കാനുള്ള തീയതി, തെരഞ്ഞെടുപ്പു തീയതി എന്നിവയും പ്രഖ്യാപിക്കും. നിലവില്‍ കോണ്‍ഗ്രസ് പ്രസിഡന്റ് സ്ഥാനത്തേക്കു രാഹുല്‍ ഗാന്ധിയുടെ പേരു മാത്രമേയുള്ളു. അദ്ദേഹത്തെ ഏകകണ്ഠമായി തെരഞ്ഞെടുക്കാനുള്ള സാധ്യതയാണുള്ളത്.
ഗുജറാത്ത്, ഹിമാചല്‍പ്രദേശ് സംസ്ഥാന തെരഞ്ഞെടുപ്പു ഫലങ്ങള്‍ക്കു മുമ്പായി രാഹുല്‍ കോണ്‍ഗ്രസ് അധ്യക്ഷ പദവിയിലെത്തുമെന്നാണു വിവരം.
https://www.facebook.com/Malayalivartha
