അടുത്തമാസം കോണ്‍ഗ്രസ് ഉപാധ്യക്ഷന്‍ രാഹുല്‍ഗാന്ധി പാര്‍ട്ടി അധ്യക്ഷനാകും. ഡിസംബര്‍ നാലിനാണ് അധ്യക്ഷ സ്ഥാനത്തേക്കുളള നാമനിര്‍ദേശപത്രിക സമര്‍പ്പിക്കേണ്ടത്. രാഹുലിനെതിരെ മറ്റാരും പത്രികസമര്‍പ്പിക്കില്ലെന്ന് ഉറപ്പായ സാഹചര്യത്തില്‍ പ്രസിഡന്റ് പ്രഖ്യാപനം അന്ന് തന്നെ നടന്നേക്കും. ഒന്നാം തീയതി തിരഞ്ഞടുപ്പ് വിഞ്ജാപനം ഇറങ്ങും. രാഹുല്‍ഗാന്ധിക്ക് പുറമേ മറ്റാരെങ്കിലും നാമനിര്‍ദേശികപത്രിക സമര്‍പ്പിക്കുകയാണെങ്കില്‍ 16ന് വോട്ടെടുപ്പ് നടത്തും. അങ്ങനെയെങ്കില്‍ ഫലപ്രഖ്യാപനം 19ന് ഉണ്ടാവും. കോണ്‍ഗ്രസ് പ്രവര്‍ത്തക സമിതി യോഗത്തിലാണ് ഈ തീരുമാനങ്ങള്‍ എടുത്തത്. 

കോണ്‍ഗ്രസ് അധ്യക്ഷ സോണിയാ ഗാന്ധിക്ക് ആരോഗ്യപ്രശ്‌നങ്ങള്‍ ഉണ്ടായതിനെ തുടര്‍ന്നാണ് പദവി ഒഴിയാന്‍ തീരുമാനിച്ചത്. അധ്യക്ഷ സ്ഥാനത്ത് ഏറ്റവും കൂടുതല്‍ വര്‍ഷം ഇരുന്നയാളാണ് സോണിയാ ഗാന്ധി. കുറേ നാളായി സജ്ജീവ രാഷ്ട്രീയത്തില്‍ അവര്‍ ഇടപെടുന്നതേയില്ല. ഗുജറാത്ത് , ഹിമാചല്‍ തെരഞ്ഞെടുപ്പുകള്‍ പാര്‍ട്ടിയുടെ യുവനേതൃത്വം നേരിടണമെന്ന് മുതിര്‍ന്ന നേതാക്കള്‍ ഉള്‍പ്പെടെ ആവശ്യപ്പെട്ടിട്ടുണ്ട്. ഗുജറാത്തില്‍ രാഹുല്‍ ഗാന്ധി നടത്തിയ റാലിയും സമുദായനേതാക്കളുമായി നടത്തിയ അനുരഞ്ജന ചര്‍ച്ചകളും കോണ്‍ഗ്രസിന് അനുകൂലതരംഗം സൃഷ്ടിച്ചെന്ന വിലയിരിത്തലിലാണ് പാര്‍ട്ടി.

47കാരനായ രാഹുല്‍ഗാന്ധി അധ്യക്ഷപദവി ഏറ്റെടുക്കാന്‍ സന്നദ്ധത അറിയിച്ചിരുന്നു. എന്നാല്‍ പാര്‍ട്ടിയാണ് അന്തിമതീരുമാനം എടുക്കേണ്ടതെന്നും വ്യക്തമാക്കിയിരുന്നു. 2013 ജനുവരി 19നാണ് രാഹുലിനെ കോണ്‍ഗ്രസ് വര്‍ക്കിംഗ് കമ്മിറ്റി ഉപാധ്യക്ഷനായി തെരഞ്ഞെടുത്തത്. ഗുജറാത്തിലെ തെരഞ്ഞെടുപ്പിന്റെ രണ്ടാം ഘട്ടത്തിന് മുമ്പ് രാഹുലിനെ അധ്യക്ഷ സ്ഥാനത്തെത്തിക്കാനാണ് കോണ്‍ഗ്രസ് നോക്കുന്നത്. 

രാഹുലിന് രാഷട്രീയ ഉപദേശം നല്‍കാന്‍ തലമുതിര്‍ന്ന നേതാക്കളില്‍ ആരെയെങ്കിലും ഉപാധ്യക്ഷനായി നിയമിക്കുമെന്നും അറിയുന്നു. മന്‍മോഹന്‍ സിങ് രാഹുലിനെ സഹായിക്കാന്‍ തയ്യാറാണെന്ന് പറഞ്ഞിരുന്നെങ്കിലും ആരോഗ്യസ്ഥിതി മോശമാണ്. എ.കെ.ആന്റണിയെ ഉപാധ്യക്ഷനായി പ്രഖ്യാപിക്കാനും സാധ്യതയുള്ളതായി റിപ്പോര്‍ട്ടുകളുണ്ട്. കാരണം സോണിയാ ഗാന്ധിയുടെ വിശ്വസ്തനാണ് അദ്ദേഹം. 

2000ലാണ് കോണ്‍ഗ്രസ് പ്രസിഡന്റ് സ്ഥാനത്തേക്ക് അവസാനമായി തെരഞ്ഞെടുപ്പ് നടന്നത്. അന്ന് സോണിയാ ഗാന്ധിക്കെതിരെ മല്‍സരിച്ച, അന്തിരച്ച നേതാവ് ജിതേന്ദ്ര പ്രസാദ് തോറ്റിരുന്നു. പിന്നീട് തെരഞ്ഞെടുപ്പ് നടത്തേണ്ട സാഹചര്യം ഉണ്ടായില്ല. രാഹുലിനെ അധ്യക്ഷനാക്കണമെന്ന് എല്ലാ സംസ്ഥാനങ്ങളിലെയും കോണ്‍ഗ്രസ് ഘടകം പ്രമേയം പാസാക്കിയിട്ടുണ്ട്. രാഹുല്‍ വരുന്നതോടെ പാര്‍ട്ടിക്ക് പുതിയ ഊര്‍ജ്ജം ലഭിക്കുമെന്നാണ് യുവനേതാക്കളടക്കം പ്രതീക്ഷിക്കുന്നത്. കുറേ വര്‍ഷങ്ങളായി കടല്‍ക്കിഴവന്‍മാരുടെ പിടിയിലാണ് കോണ്‍ഗ്രസെന്ന് അവര്‍ വിമര്‍ശനം ഉന്നയിക്കുന്നു.