വസ്​ത്രത്തിനു മുകളില്‍ പൂണൂല്‍ധരിച്ച കോഗ്രസ് ഉപാധ്യക്ഷൻ രാഹുല്‍ ഗാന്ധിയ്ക്കെതിരെ ബി.ജെ.പി ലോക്​ സഭാ എം.പി മീനാക്ഷി ലേഖി. വസ്​ത്രത്തിനു മുകളില്‍ പൂണൂല്‍ധരിച്ച രാഹുൽ എന്ന ബ്രാഹ്​മണന്‍ ശ്രീരാമനില്‍ വിശ്വസിക്കുന്നുണ്ടോ എന്നാണ് മീനാക്ഷി ചോദിക്കുന്നത്.

വസ്​ത്രത്തിനു മുകളില്‍ പൂണുല്‍ ധരിക്കുന്ന ബ്രാഹ്​മണനെ താന്‍ ആദ്യമായി കാണുകയാണെന്നും മീനാക്ഷി പറഞ്ഞു. കോണ്‍ഗ്രസിന്റെ ഗുജറാത്ത്​ ഘടകം രാഹുലിന്റെ വസ്​ത്രത്തി​ന്റെ മുകളില്‍ പൂണൂല്‍ ദൃശ്യമായ ഫോ​ട്ടോ ട്വിറ്ററില്‍ പോസ്​റ്റ്​ ചെയ്തിരുന്നു. പു​ണൂല്‍ ധാരിയായ ബ്രാഹ്​മണന്‍ ശിവഭക്​തനാണെന്ന്​ അവകാശപ്പെടുന്നു. ശ്രീരാമനും ശിവഭക്​തനായിരുന്നു. എന്നാല്‍ ശ്രീരാമന്‍ ജീവിച്ചിരുന്നിട്ടേയില്ല എന്ന നിലപാടിലാണ്​ കോണ്‍ഗ്രസ്​.

ശ്രീരാമന്‍ രാവണ നിഗ്രഹത്തിനായി ശ്രീലങ്കയിലേക്ക്​ നിര്‍മിച്ച രാമസേതുവും ഇല്ലെന്നാണ്​ കോണ്‍ഗ്രസ്​ പറയുന്നത്​. അതിനാല്‍ രാഹുല്‍ നയം വ്യക്​തമാക്കണമെന്നും ​മീനാക്ഷി ലേഖി ആവശ്യപ്പെട്ടു. 2007ല്‍ യു.പി.എ സര്‍ക്കാറിന്റെ കാലത്ത്​ രാമസേതു സമുദ്രം ഷിപ്പിങ്ങ്​ കനാല്‍ ​പദ്ധതിയുമായി ബദ്ധപ്പെട്ട്​ പുരാവസ്​തു വകുപ്പ്​ സുപ്രീം കോടതിയില്‍ നല്‍കിയ സത്യവാങ്​മൂലത്തിലാണ്​ രാമന്റെയും രാമസേതുവി​ന്റെയും നിലനില്‍പ്പിനെ നിഷേധിച്ചിരുന്നത്​.

രാമനും രാമസേതുവും നിലനിന്നിരുന്നുവെന്നതിന്​ തെളിവില്ലെന്നായിരുന്നു സത്യവാങ്​മൂലത്തില്‍ അറിയിച്ചിരുന്നത്​. വിവാദമായതിനെ തുടര്‍ന്ന്​ അത്​ പിന്നീട്​ പിന്‍വലിച്ച്‌​ പുതിയ സത്യവാങ്​മൂലം നല്‍കിയിരുന്നു. രാമക്ഷേത്ര നിര്‍മാണത്തെ കുറിച്ചും രാഹുലി​ന്റെ അഭിപ്രായം അറിയാന്‍ ആഗ്രഹമുണ്ടെന്നും മീനാക്ഷി ലേഖി പറഞ്ഞു.