പ്രളയക്കെടുതില്‍ നിന്ന് കരകയറുന്ന കേരളത്തിനു സഹായവുമായി ഇന്ത്യന്‍ ക്രിക്കറ്റ് ടീമും. ഇംഗ്ലണ്ടിനെതിരായ മൂന്നാം മല്‍സരത്തിലെ മുഴുവന്‍ മാച്ച് ഫീസും കേരളത്തിനായി ടീം നല്‍കുമെന്നാണ് റിപ്പോര്‍ട്ട്. മാച്ച് ഫീയായി ടീമിന് രണ്ടു കോടി രൂപയോ അതില്‍ കൂടുതലോ തുക ലഭിക്കും. 

ഒരു ടെസ്റ്റ് മല്‍സരത്തിന് ടീമിലുള്ള താരങ്ങള്‍ക്ക് 15 ലക്ഷം രൂപയും റിസര്‍വ് താരങ്ങള്‍ക്ക് അതിന്റെ പകുതിയുമാണ് ലഭിക്കുക. ഇംഗ്ലണ്ടിനെതിരായ ട്രെന്‍ബ്രിജ് ടെസ്റ്റ് മല്‍സരത്തിനു ശേഷം വിജയം കേരളത്തിന് സമര്‍പ്പിക്കുന്നതായി ക്യാപ്റ്റന്‍ വിരാട് കോഹ്‌ലി പറഞ്ഞിരുന്നു. കേരളത്തില്‍ വീടുകളിലേക്കു മടങ്ങുന്ന പ്രളയബാധിതര്‍ക്കാണ് ഈ ജയം സമര്‍പ്പിക്കുന്നത്. കേരളത്തിലെ കാര്യങ്ങള്‍ കഷ്ടമാണ്. ക്രിക്കറ്റ് ടീമെന്ന നിലയ്ക്കു ഞങ്ങള്‍ക്കു ചെയ്യാന്‍ സാധിക്കുന്ന ചെറിയ കാര്യമാണിത് കോഹ്‌ലി ഇംഗ്ലണ്ടില്‍ പറഞ്ഞു. നിറഞ്ഞ കയ്യടിയോടെയാണ് ഗാലറി വിരാട് കോഹ്‌ലിയുടെ പ്രസ്താവനയെ സ്വീകരിച്ചത്. 

അതേസമയം ക്യാപറ്റന്‍ വിരാട് കോഹ്‌ലിക്കും ഇന്ത്യന്‍ ക്രിക്കറ്റ് ടീമിനും നന്ദിയുണ്ടെന്ന് മുഖ്യമന്ത്രി പിണറായി വിജയനും അറിയിച്ചു. 203 റണ്‍സിനാണ് ട്രെന്‍ബ്രിജില്‍ നടന്ന മൂന്നാം ടെസറ്റ് മല്‍സരത്തില്‍ ഇന്ത്യ ജയിച്ചത്. മല്‍സരത്തിന്റെ ആദ്യ ഇന്നിങ്‌സില്‍ അര്‍ധസെഞ്ചുറിയും രണ്ടാം ഇന്നിങ്‌സില്‍ സെഞ്ചുറിയും സ്വന്തമാക്കിയ കോഹ്!ലിയാണു മല്‍സരത്തിലെ പ്ലേയര്‍ ഓഫ് ദി മാച്ചും. ജയത്തോടെ അഞ്ചു മല്‍സരങ്ങളടങ്ങുന്ന പരമ്പര 2-1 എന്ന നിലയിലായി. മല്‍സരത്തില്‍ ആദ്യ ഇന്നിങ്‌സില്‍ ഹാര്‍ദിക് പാണ്ഡ്യയും രണ്ടാം ഇന്നിങ്‌സില്‍ ജസ്പ്രീത് ബുംമ്രയും ഇന്ത്യയ്ക്കു വേണ്ടി അഞ്ച് വിക്കറ്റ് പ്രകടനവും നടത്തി. ആദ്യ രണ്ടു മല്‍സരങ്ങളിലും ജയം ഇംഗ്ലണ്ടിനായിരുന്നു. 

കേരളത്തിനു വേണ്ടി ട്വിറ്ററിലും കോഹ്‌ലി നിലപാട് വ്യക്തമാക്കിയിരുന്നു. കേരളത്തിലെ എല്ലാവരും സുരക്ഷിതരായിരിക്കുക. എത്രയും പെട്ടെന്ന് സാഹചര്യങ്ങള്‍ മാറുമെന്നാണ് പ്രതീക്ഷിക്കുന്നത്. ഇത്തരമൊരു ദുരവസ്ഥയില്‍ പിന്തുണയ്ക്കാനെത്തിയ സൈന്യത്തിനും എന്‍ഡിആര്‍എഫിനും നന്ദി പറയുന്നു. ശക്തരായും സുരക്ഷിതരായും നില്‍ക്കുക ഓഗസ്റ്റ് 17ന് കോഹ്‌ലി സമൂഹമാധ്യമത്തില്‍ കുറിച്ചു.