പാക്കിസ്ഥാനെ ഏഴു വിക്കറ്റിനു തകര്‍ത്ത് ഇന്ത്യ വനിതകളുടെ ടി20 ഏഷ്യാകപ്പ് ഫൈനലിലേക്ക് മാര്‍ച്ചു ചെയ്തു. പാക്കിസ്താന്‍ ഉയര്‍ത്തിയ 73 റണ്‍സ് ലക്ഷ്യം പതിനേഴാം ഓവറില്‍ മൂന്നു വിക്കറ്റ് നഷ്ടത്തില്‍ ഇന്ത്യ മറികടക്കുകയായിരുന്നു. ടോസ് നേടി ആദ്യം ബാറ്റിങ്ങ് തിരഞ്ഞെടുത്ത പാക്കിസ്താന്‍ നിശ്ചിത ഓവറില്‍ ഏഴു വിക്കറ്റ് നഷ്ടത്തില്‍ 72 റണ്‍സ് നേടി.

തുടര്‍ന്ന് 73 റണ്‍സ് എന്ന ചെറിയ ലക്ഷ്യം മറികടക്കാനിറങ്ങിയ ഇന്ത്യയ്ക്ക് ആദ്യ ഓവറില്‍ തന്നെ മിതാലി രാജിനെ നഷ്ടമായി. സ്‌കോര്‍ ബോര്‍ഡില്‍ ഒരു റണ്‍ മാത്രം പിറന്നപ്പോഴാണ് മിതാലിനെ രാജിനെ ഇന്ത്യയ്ക്ക് നഷ്ടമായത്. തൊട്ടുപിന്നാലെ അനം അമീന്‍ തന്നെ ഇന്ത്യയുടെ രണ്ടാമത്തെ വിക്കറ്റും പറിച്ചു. ഒരു റണ്‍ പോലും എടുക്കാതെയാണ് ദീപ്തി ശര്‍മ്മയെ അമീന്‍ മടക്കിയത്.

രണ്ടു ഓവര്‍ പിന്നിട്ടപ്പോള്‍ രണ്ടു വിക്കറ്റിന് അഞ്ചു റണ്‍സ് എന്ന നിലയില്‍ ഇന്ത്യയെ പ്രതിരോധത്തിലേക്ക് പാക്കിസ്താന്‍ തള്ളിവിട്ടു. പിന്നാലെ ക്യാപ്റ്റന്‍ ഹര്‍മന്‍ പ്രീത് കൗറും സ്മൃതി മന്ദാനയും ചേര്‍ന്ന് മന്ദഗതിയില്‍ ഇന്ത്യയ്ക്ക് അടിത്തറ പാകി വിജയത്തിലേക്ക് എത്തിക്കുകയായിരുന്നു.

വിജയത്തിലേക്ക് അടുത്തെത്തിയപ്പോള്‍ 38 റണ്‍സ് എടുത്ത സ്മൃതി മന്ദാനയുടെ വിക്കറ്റ് നശ്ര സന്ദു വീഴ്ത്തി. ഇന്ത്യന്‍ സ്‌കോര്‍ 70 ല്‍ എത്തിനില്‍ക്കുമ്പോഴായിരുന്നു സ്മൃതി മന്ദാനയെ നഷ്ടമായത്. പതിനേഴാം ഓവറില്‍ ഇന്ത്യ ലക്ഷ്യം മറികടന്ന് വനിതകളുടെ ഏഷ്യാകപ്പ് ഫൈനലിലേക്ക് മാര്‍ച്ചു ചെയ്തു.

ഇന്നു നടക്കുന്ന ബംഗ്ലാദേശും മലേഷ്യയും തമ്മിലുള്ള സെമി പോരാട്ടത്തിലെ വിജയികളാകും ഫൈനലിലെ ഇന്ത്യയുടെ എതിരാളി. ഞായാറാഴ്ച ആണ് വുമണ്‍സ് ടി20 ഏഷ്യാകപ്പ് ഫൈനല്‍.