യുവേഫ കപ്പില്‍ ലിവര്‍പൂള്‍ തകര്‍പ്പന്‍ ജയത്തോടെ സെമിയില്‍ കടന്നു. ആദ്യാവസാനം ആവേശം നിറഞ്ഞ മത്സരത്തില്‍ ബൊറൂസ്യ ഡോര്‍ട്ട്മുണ്ടിനെ മൂന്നിനെതിരെ നാലു ഗോളുകള്‍ക്ക് തകര്‍ത്താണ് ആന്‍ഫീല്‍ഡിലെ സ്വന്തം കാണികള്‍ക്കുമുമ്പില്‍ ലിവര്‍പൂള്‍ സെമിയിലേക്കു മാര്‍ച്ച് ചെയ്തത്. 

ആദ്യപാദത്തില്‍ ഇരുടീമും ഓരോ ഗോളിനു സമനില പാലിച്ചിരുന്നു. അതിനാല്‍ തന്നെ രണ്ടാം പാദം മരണക്കളിയായിരുന്നു. ലിവര്‍പൂളിന്റെ മൈതാനത്തെ രണ്ടും കല്‍പ്പിച്ച് ആക്രമണത്തിനിറങ്ങിയ ഡോര്‍ട്ട്മുണ്ടിന്റേതായിരുന്നു ആദ്യ പകുതി. അഞ്ചാം മിനിറ്റില്‍ ഗോളടി തുടങ്ങിയ അവര്‍ ആദ്യപകുതി അവസാനിക്കുമ്പോള്‍ രണ്ടുഗോള്‍ ലീഡിന്റെ അവകാശികളായാണ് കളംവിട്ടത്. ഹെന്റിക് മഹിതര്യാനയാണ് ചുവപ്പുകോട്ടയെ പിളര്‍ന്ന് ലിവര്‍പൂള്‍ പോസ്റ്റില്‍ ആദ്യം പന്തെത്തിച്ചത്. രണ്ടാം ഗോള്‍ എമെറിക് ഒബമെയാംഗിന്റെ ബൂട്ടില്‍നിന്നായിരുന്നു. ആദ്യപകുതി അവസാനിക്കുമ്പോള്‍ ഡോര്‍ട്ട്മുണ്ടിന് എതിരില്ലാത്ത രണ്ടു ഗോള്‍ ലീഡ്. 
എന്നാല്‍ രണ്ടാം പകുതിയില്‍ കളിമാറി. ഡോര്‍ട്ട്മുണ്ടില്‍നിന്നും കളിയുടെ ഒഴുക്ക് തിരിച്ചുപിടിച്ച ലിവര്‍പൂള്‍ രണ്ടാം പകുതി തുടങ്ങിയതും നയംവ്യക്തമാക്കി. 48 -ാം മിനിറ്റില്‍ ഡിവോക് ഒറീജിയുടെ ഗോള്‍ ഡോര്‍ട്ട്മുണ്ടിന്റെ ലീഡ് ഒന്നായി കുറച്ചു. തൊട്ടുപിന്നാലെ ഡോര്‍ട്ട്മുണ്ട് വീണ്ടും ലീഡ് രണ്ടായി ഉയര്‍ത്തി. മാര്‍കോ റോയസായിരുന്നു ഗോള്‍ നേടിയത്. 

പിന്നീടങ്ങോട്ട് ലിവര്‍പൂള്‍ ജയിക്കാനുള്ള കളിയാണ് കളിച്ചത്. 66 -ാം മനിറ്റില്‍ ഫിലിപ്പി കൊന്റിനോയും 77 ാം മിനിറ്റില്‍ മമാദു സാക്കോയും ഡോര്‍ട്ട്മുണ്ട് വലചലിപ്പിച്ചു. ഇതോടെ ലിവര്‍പൂള്‍ കളി സമാസം എത്തിച്ചു. നിശ്ചിത സമയംവരെ പിടിച്ചുനിന്ന ഡോര്‍ട്ട്മുണ്ടിന്റെ സമനില ഇഞ്ചുറി ടൈമില്‍ തെറ്റി. 91-ാം മിനിറ്റില്‍ ആന്‍ഫീല്‍ഡ് കാത്തിരുന്ന ഗോള്‍ വന്നു. ഡിജാന്‍ ലോവ്‌റന്റെ തലയില്‍നിന്നായിരുന്നു വിജയഗോള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha