ഐ.എസ്.എല്ലിലെ രണ്ടാം സെമിഫൈനലില് ഇന്ന് കേരള ബ്ലാസ്റ്റേഴ്സും ഡല്ഹി ഡൈനാമോസും ഏറ്റുമുട്ടും
ഇന്ത്യന് സൂപ്പര് ലീഗ് സെമിഫൈനലില് രണ്ടാം സെമിഫൈനലിലെ രണ്ടാം പാദ മത്സരത്തില് കേരള ബ്ലാസ്റ്റേഴ്സും ഡല്ഹി ഡൈനാമോസും തമ്മില് ഏറ്റുമുട്ടും. ഡല്ഹിയുടെ മൈതാനത്താണ് മത്സരം. ആദ്യപാദത്തില് ഒരു ഗോളിന് ഡല്ഹിയെ തോല്പ്പിച്ച ആത്മവിശ്വാസത്തിലാണ് ബ്ലാസ്റ്റേഴ്സ് ഇന്ന് കളിക്കാനിറങ്ങുക.
ഇന്ന് ജയിക്കുകയോ സമനില ആകുകയോ ചെയ്താല് കേരള ബ്ലാസ്റ്റേഴ്സ് 18-ന് നടക്കുന്ന ഫൈനലില് കൊല്ക്കത്തയെ കേരളത്തിന്റെ ഹോം ഗ്രൗണ്ടായ കൊച്ചി ജവാഹര്ലാല് നെഹ്റു സ്റ്റേഡിയത്തില് നേരിടും. മറിച്ച് 1-0 എന്ന മാര്ജിനിലാണ് തോല്ക്കുന്നതെങ്കില് കളി എക്സ്ട്രാ ടൈമിലേയ്ക്കും പെനാല്റ്റി ഷൂട്ടൗട്ടിലേക്കും നീളും.
കരുത്തും കുറവും പരസ്പരം മനസ്സിലാക്കിയ ടീമുകളാണ് കേരളാ ബ്ലാസ്റ്റേഴ്സും ഡെല്ഹി ഡൈനാമോസും. പരിശീലകര് നടത്തിയ വാര്ത്താ സമ്മേളനത്തിലടക്കം ആ ബോധ്യം പ്രകടമായിരുന്നു. ജയത്തില് കുറഞ്ഞതൊന്നും പ്രതീക്ഷിക്കുന്നില്ലെന്ന് പരിശീലകന് സ്റ്റീവ് കോപ്പല് പറഞ്ഞു.
ഹോം ഗ്രൗണ്ടെന്ന ആനുകൂല്യം ഡല്ഹിക്ക് തീര്ച്ചയായും ഉണ്ട്. മാത്രമല്ല ഈ സീസണില് ഏറ്റവും കൂടുതല് ഗോളുകള് നേടിയ കളിക്കാരും ഡല്ഹിക്ക് സ്വന്തമാണ്. കൊച്ചിയില് കാണിച്ച പിഴവുകള് ബ്ലാസ്റ്റേഴ്സ് തിരുത്തിയില്ലെങ്കില് ഡല്ഹിക്ക് മുന്നില് പിടിച്ച് നില്ക്കുക എളുപ്പമാകില്ല. ഡല്ഹിയുടെ മാര്സെലീഞ്ഞ്യോ, ഗാഡ്സെ, മലൂദ ത്രയത്തെ തളക്കാന് ആദ്യപാദത്തിലെന്നപോലെ ഹ്യൂസും, ഹെങ്ബര്ട്ടും ജിങ്കനും ഹോസുവും കിണഞ്ഞ് ശ്രമിച്ചാലേ ഇന്നത്തെ മത്സരത്തില് ബ്ലാസ്റ്റേഴ്സിന് പ്രതീക്ഷയുള്ളൂ.
https://www.facebook.com/Malayalivartha
