അര്‍ജന്റീനയുടെ സൂപ്പര്‍താരം ലിയോണല്‍ മെസ്സി വിവാഹിതനാകുന്നു. കുട്ടിക്കാലം മുതലുള്ള താരത്തിന്റെ കാമുകി അന്റോണെല്ല റോകുസോ ആണ് വധു. റിപ്പോര്‍ട്ടുകള്‍ ശരിയാണെങ്കില്‍ അടുത്തവര്‍ഷം വിവാഹം ഉണ്ടാകുമെന്നാണ് കരുതപ്പെടുന്നത്. കഴിഞ്ഞ 9 വര്‍ഷമായി മെസ്സിയും റോകുസയും ഒന്നിച്ചു താമസിക്കുകയാണ്. ഈ ബന്ധത്തില്‍ ഇരുവര്‍ക്കും രണ്ടു കുട്ടികളുമുണ്ട്. റോകുസോയുമായുള്ള വിവാഹത്തിനു മെസ്സി തിയ്യതി വരെ നിശ്ചയിച്ചതായിട്ടാണ് വാര്‍ത്തകള്‍ വരുന്നത്.
വയസ്സുവരെ അര്‍ജന്റീനയിലെ സാന്റഫീയിലായിരുന്നു ഇരുവരും താമസിച്ചിരുന്നത്. ഇതിനുശേഷം മെസ്സി ബാഴ്‌സലോണയിലേക്കു പോയി. എന്നാല്‍, ഇരുവരുടെയും ബന്ധത്തിന് അപ്പോഴും ഉലച്ചിലൊന്നും തട്ടിയില്ല. 2007 മുതലാണ് ഇരുവരും ലിവിംഗ് ടുഗദര്‍ റിലേഷന്‍ ആരംഭിച്ചത്. ഇതില്‍ രണ്ടു കുട്ടികളുമുണ്ട്. മൂത്ത ആണ്‍കുട്ടി തിയാഗോയ്ക്ക് നാലു വയസ്സായി. രണ്ടാമത്തെ മകന്‍ മതേയുവിനു ഒന്നരവയസ്സാകുന്നു. ഇപ്പോഴാണ് ഇരുവരും വിവാഹിതരാകാം എന്നു നിശ്ചയിച്ചത്.
അര്‍ജന്റീനിയന്‍ മാധ്യമപ്രവര്‍ത്തകനായ യുവാന്‍ പാബ്ലോ വാഴ്‌സ്‌കിയാണ് മെസ്സിയുടെ വിവാഹക്കാര്യം പുറത്തുവിട്ടത്. എല്ലാവര്‍ക്കും ക്ഷണമുണ്ടാകും. അര്‍ജന്റീനയില്‍ വലിയ ആഘോഷമായിട്ടായിരിക്കും വിവാഹം നടക്കുകയെന്നും യുവാന്‍ പാബ്ലോ പറയുന്നു. തിയ്യതി സംബന്ധിച്ച് വ്യക്തതയൊന്നും ലഭിച്ചിട്ടില്ല. കൂടുതല്‍ സാധ്യതയുള്ള മൂന്നു മാസങ്ങളെ പറ്റി റിപ്പോര്‍ട്ടുകളുണ്ട്. പക്ഷേ അക്കാര്യത്തിലും സ്ഥിരീകരണം ആയ ശേഷം മാത്രം പുറത്തുപറയാമെന്നാണ് പാബ്ലോ പറയുന്നത്.