ഫിഫ റാങ്കിങ്ങില്‍ ചരിത്ര കുതിപ്പ് നടത്തി ദേശീയ ഫുട്‌ബോള്‍ ടീം. വ്യാഴാഴ്ച പ്രസിദ്ധീകരിച്ച റാങ്കിങ്ങില്‍ 31 സ്ഥാനങ്ങള്‍ മെച്ചപ്പെടുത്തിയ ഇന്ത്യന്‍ ടീം, 101 ആം സ്ഥാനത്തേക്കാണ് മുന്നേറ്റം നടത്തിയിരിക്കുന്നത്. 1996 നുശേഷം റാങ്കിങ്ങിലെ ഇന്ത്യയുടെ മികച്ച നേട്ടമാണിത്. കൂടാതെ ഇന്ത്യന്‍ ടീം ഏഷ്യന്‍ രാജ്യങ്ങള്‍ക്ക് ഇടയില്‍ പതിനൊന്നാം സ്ഥാനത്തേക്കും ഉയര്‍ന്നു.

അന്താരാഷ്ട്ര സൗഹൃദ മത്സരത്തില്‍ കംബോഡിയക്കെതിരെയും എ.എഫ്.സി കപ്പ് യോഗ്യതാ മത്സരത്തില്‍ മ്യാന്‍മറിനെതിരെയും നേടിയ ജയങ്ങളാണ് ഇന്ത്യന്‍ ടീമിന് തുണയായത്. കഴിഞ്ഞ പതിമൂന്ന് മത്സരങ്ങളില്‍ പതിനൊന്നിലും ഇന്ത്യ വിജയിച്ചിരുന്നു. ഇതില്‍ തന്നെ ആറെണ്ണം തുടര്‍ച്ചയായ ജയങ്ങളാണ്. കഴിഞ്ഞ വര്‍ഷം പ്യൂര്‍ട്ടോറിക്കോയെ 4-1ന് തകര്‍ത്തതാണ് ഇന്ത്യന്‍ മണ്ണിലെ ദേശീയ ടീമിന്റെ അവസാന ജയം.

1996ല്‍ 94 ആം റാങ്കിലെത്തിയതാണ് ഇന്ത്യയുടെ ഇതുവരെയുള്ള ഏറ്റവും മികച്ച നേട്ടം. 2015 ഫെബ്രുവരിയില്‍ രണ്ടാം തവണയും ദേശീയ കോച്ചായി സ്റ്റീഫന്‍ കോണ്‍സ്റ്റന്റൈന്‍ സ്ഥാനമേറ്റെടുക്കുമ്പോള്‍ ദേശീയ ടീമിന്റെ റാങ്ക് 171 ആയിരുന്നു. 2015 മാര്‍ച്ചില്‍ 173 ലേക്ക് വീണ്ടും കൂപ്പുകുത്തിയിരുന്നു. തുടര്‍ന്ന് നടത്തിയ അവിസ്മരണീയ പോരാട്ടങ്ങളാണ് ഇന്ത്യന്‍ ടീമിനെ ചരിത്ര നേട്ടത്തിലേക്ക് എത്തിച്ചത്.