ഇന്ത്യയുടെ സമീപ ഫുട്‌ബോള്‍ ചരിത്രത്തിലെ ഏറ്റവും സന്തോഷവും പ്രതീക്ഷയും നല്‍കിയ ദിവസമായിരുന്നു ഇന്ന്. പരിശീലനത്തിന്റെ ഭാഗമായി യൂറോപ്പില്‍ പര്യടനം നടത്തുന്ന ഇന്ത്യയുടെ അണ്ടര്‍ 17 ടീം കരുത്തരായ ഇറ്റലിയെ പരാജയപ്പെടുത്തി. ഏകപക്ഷീയമായ രണ്ടു ഗോളിനായിരുന്നു ഇന്ത്യയുടെ വിജയം. മലയാളി താരം രാഹുല്‍ പ്രവീണിന്റെ പ്രകടനമാണ് ഇന്ത്യന്‍ വിജയത്തില്‍ നിര്‍ണായകമായത്.

ഇറ്റലില്‍ അറിസോയില്‍ വെച്ച് നടന്ന സൗഹൃദ മത്സരത്തിലാണ് ഇന്ത്യയുടെ ഈ മിന്നും ജയം ഉണ്ടായത്. ക്രൊയേഷ്യയില്‍ നടക്കുന്ന അണ്ടര്‍ 17 യൂറോപ്യന്‍ ചാമ്ബ്യന്‍ഷിപ്പില്‍ നിന്നെത്തിയ ഇറ്റലി അണ്ടര്‍ 17 ടീമിനെ നേരിട്ട ഇന്ത്യ തികച്ചും ഏകപക്ഷീയമായ വിജയമാണ് നേടിയത്. കളിയിലുടനീളം ആധിപത്യം നിലനിര്‍ത്തിയ ഇന്ത്യ ആദ്യ പകുതിയില്‍ അഭിജിത്തിലൂടെയാണ് ആദ്യം മുന്നിലെത്തിയത്.

മികച്ച പ്രസ്സിംഗ് ടാക്ടിക്‌സിലൂടെ ഇറ്റലിലെ പന്തു കൈയ്യില്‍ വെക്കാന്‍ വിടാതെ ഉള്ള സുന്ദര ഫുട്‌ബോളായൊരുന്നു ഇന്ത്യ കാഴ്ചവെച്ചത്. രണ്ടാം പകുതിയില്‍ മലയാളി താരം രാഹുല്‍ ആണ് ഇന്ത്യയുടെ വിജയം ഉറപ്പിച്ച രണ്ടാം ഗോള്‍ നേടിയത്. തൃശ്ശൂര്‍ സ്വദേശിയാണ് രാഹുല്‍. ഇന്ത്യയുടെ ലോകകപ്പ് ഒരുക്കങ്ങള്‍ക്ക് കരുത്താകും ഈ വിജയം. നേരത്തെ പോര്‍ച്ചുഗലില്‍ പര്യടനം നടത്തിയ ഇന്ത്യ വിജയം നേടിയില്ലെങ്കിലും മികച്ച പ്രകടനങ്ങളുമായി ശ്രദ്ധ നേടിയിരുന്നു.