ബാഴ്‌സലോണ സൂപ്പര്‍ താരം ലയണല്‍ മെസിക്കു പിന്നാലെ റയല്‍ മാഡ്രിഡ് താരം ക്രിസ്റ്റ്യാനോ റൊണാള്‍ഡോയും നികുതിവെട്ടിപ്പ് കുരുക്കില്‍. നികുതി വകുപ്പില്‍ തര്‍ക്കമുണ്ടെന്ന് റിപ്പോര്‍ട്ടില്‍ പറയുന്നു . കേസെടുക്കുന്നതിനു മുമ്പ് റൊണാള്‍ഡോയുടെ വെട്ടിപ്പ്, സാങ്കേതിക പിഴവാണോയെന്നാണ് പ്രധാനമായും പരിശോധിക്കുന്നത്. 89 ലക്ഷം ഡോളര്‍ റൊണാള്‍ഡോ നികുതിയിനത്തില്‍ വെട്ടിച്ചെന്ന് സ്പാനിഷ് നികുതി വകുപ്പ് ഉദ്യോഗസ്ഥരെ ഉദ്ധരിച്ച് കാഡെന കോപെ റേഡിയോ റിപ്പോര്‍ട്ട് ചെയ്തു.
റൊണാള്‍ഡോയ്‌ക്കെതിരേ കേസെടുക്കുന്നത് സംബന്ധിച്ച് നികുതി വകുപ്പില്‍ തര്‍ക്കമുണ്ടെന്നാണ് റിപ്പോര്‍ട്ടില്‍ പറയുന്നത്. കേസെടുക്കുന്നതിനു മുന്പ് നികുതി വെട്ടിപ്പ് സാങ്കേതിക പിഴവാണെന്നു കണ്ടെത്തിയാല്‍ റൊണാള്‍ഡോയ്ക്ക് 89 ലക്ഷം ഡോളറും ഇതിന്റെ പിഴയും അടച്ച് രക്ഷപ്പെടാം . എന്നാല്‍ നികുതി വകുപ്പ് കേസ് രജിസ്റ്റര്‍ ചെയ്താല്‍ റൊണാള്‍ഡോ ക്രിമിനല്‍ നടപടികള്‍ നേരിടേണ്ടിവരും.
നികുതി വെട്ടിപ്പ് കേസില്‍ ബാഴ്‌സലോണയുടെ സൂപ്പര്‍ താരം ലയണല്‍ മെസിക്ക് സ്പാനിഷ് കോടതി 21 മാസത്തെ തടവും 20 ലക്ഷം യൂറോ (ഏകദേശം 13.2 കോടി രൂപ) പിഴയും വിധിച്ചിരുന്നു. നേരത്തെയുള്ള വിധിക്കെതിരേ മെസി സമര്‍പ്പിച്ച അപ്പീല്‍ തള്ളിക്കൊണ്ടാണ് കോടതി ശിക്ഷ പ്രഖ്യാപിച്ചത്. 2016 ജൂലൈയിലായിരുന്നു കോടതി മെസിക്കു ശിക്ഷ വിധിച്ചത്. സ്പാനിഷ് ലാ ലിഗ ക്ലബ് ബാഴ്‌സലോണ താരമായ മെസി 2007നും 2009നും ഇടയ്ക്കു പ്രതിഫലമായി ലഭിച്ച പണത്തില്‍ 42 ലക്ഷം യൂറോ (ഏകദേശം 32 കോടി രൂപ) നികുതി വെട്ടിച്ചു എന്നതായിരുന്നു കേസ്.