ഫിഫ കോണ്‍ഫിഡറേഷന്‍ കപ്പില്‍ ലോകചാമ്പ്യന്മാരായ ജര്‍മ്മനി ആഫ്രിക്കന്‍ നേഷന്‍സ് കപ്പ് ജേതാക്കളായ കാമറൂണിനെ തകര്‍ത്തും കോപ്പ അമേരിക്ക ജേതാക്കളായ ചിലി ഓസ്‌ട്രേലിയയോട് സമനില നേടിയും സെമിഫൈനലിലേക്ക് പ്രവേശനം നേടി. ജര്‍മ്മനി ഗ്രൂപ്പ് ചാമ്പ്യന്മാരായാണ് സെമിയില്‍ കടന്നത്.

ഒന്നിനെതിരെ മൂന്ന് ഗോളുകള്‍ക്കാണ് ജോക്കിം ലോയുടെ കുട്ടിപ്പട ആഫ്രിക്കന്‍ കരുത്തന്മാരെ കൊമ്പ്കുത്തിച്ചത്. കളി തുടങ്ങിയത് മുതല്‍ ആദ്യ ഇരുപതോളം മിനിറ്റില്‍ കാമറൂണിന്റെ വരുതിയിലായിരുന്നു മത്സരം. ആദ്യപകുതി അവസാനിക്കുന്നത് വരെ ഗോള്‍രഹിതമായിരുന്നു  മത്സരം. ജര്‍മ്മനിയുടെ പ്രതിരോധ നിര കോട്ട പോലെ കാമറൂണ്‍ അക്രമണനിരയെ പ്രതിരോധിച്ച് നിന്നു. രണ്ടാംപകുതി തുടങ്ങി 48ആം മിനിറ്റില്‍ ഡിമിര്‍ബെയുടെ വക മിന്നല്‍ ഗോള്‍ പിറന്നു. അതോടെ ജര്‍മ്മനി തങ്ങളുടെ തനത് ശൈലി പുറത്തെടുത്തു. തുടരെത്തുടരെ ആക്രമണം അഴിച്ചുവിട്ടു. അതിന്റെ ഫലമായി 66ആം മിനിറ്റില്‍ ടിം വെര്‍ണറിന്റെ വക ഒരു കിടിലന്‍ ഹെഡ്ഡര്‍ ഗോള്‍. കാമറൂണ്‍ തികച്ചും പ്രതിരോധത്തിലായി. പിന്നീട് കാമറൂണിന്റെ സാനിയ ചുവപ്പ് കാര്‍ഡ് കണ്ട് പുറത്തായത് അവര്‍ക്ക് തലയ്ക്കടിയേറ്റത് പോലെയായി.

എന്നാല്‍ എഴുപത്തിയെട്ടാം മിനിറ്റില്‍ അബൂബക്കറിന്റെ വക കാമറൂണ്‍ ഒരെണ്ണം തിരിച്ചടിച്ചു. ജര്‍മ്മന്‍ ഗോള്‍ കീപ്പര്‍ ടെര്‍ സ്‌റ്റെഗന്റെ പിഴവിലൂടെയാണ് ആ ഗോള്‍ പിറന്നത്. മടക്ക ഗോള്‍ വീണതും ജര്‍മ്മനി വീണ്ടും ആക്രമണം തുടര്‍ന്നു. ടിം വെര്‍ണറിന്റെ വക 81ആം മിനിറ്റില്‍ ജര്‍മ്മനിയുടെ മൂന്നാം ഗോള്‍. ഇതോടെ ജര്‍മ്മനി ഗ്രൂപ്പ് ചാമ്പ്യന്മാരായി സെമിയിലേക്ക്.

ഗ്രൂപ്പ് ബിയിലെ മറ്റൊരു മത്സരത്തില്‍ കരുത്തരായ ചിലി ഓസ്‌ട്രേലിയയോട് 1-1 സമനില വഴങ്ങി. വിരസമായ മത്സരത്തില്‍ ഓസ്‌ട്രേലിയയാണ് ആദ്യം ലീഡ് നേടിയത്. ആദ്യപകുതി അവസാനിക്കുന്നതിന് തൊട്ട് മുന്‍പ് ട്രോയ്‌സി ഗോള്‍ നേടി. ചിലി വിറച്ച നിമിഷം. എന്നാല്‍ 67ആം മിനിറ്റില്‍ ചിലിയുടെ റോഡ്രിഗസ് ഗോള്‍ മടക്കിയടിച്ച് ടീമിനെ തോല്‍വിയില്‍ നിന്നും കാത്തു.

സെമിഫൈനലുകളില്‍ ജര്‍മ്മനി മെക്‌സിക്കോയെയും ചിലി പോര്‍ച്ചുഗലിനെയും നേരിടും.