അണ്ടർ 17 ഫുട്ബോൾ ലോകകപ്പിൽ ആത്മവിശ്വസത്തോടെ ഇന്ത്യൻ ടീം.കരുത്തരായ എതിരാളികളെ എങ്ങനെ പൂട്ടണമെന്ന് ടീമിന്റെ വിദേശ പര്യടനങ്ങളില്‍ നിന്നും ഉൾക്കൊണ്ടിട്ടുണ്ടെന്നും കരുത്തരായ എതിരാളികളെ കണ്ട് പേടിച്ചോടാൻ ഞങ്ങളില്ല, പോരാടി ജയിക്കാനുറച്ചാണ് ടീം ഇറങ്ങുന്നതെന്നും ഇന്ത്യൻ ക്യാപ്റ്റന്‍ അമര്‍ജിത് സിംഗ്. കഴിഞ്ഞ കുറച്ച് വര്‍ഷങ്ങളായി ഇന്ത്യൻ ടീം പരിശീലകനായ ലൂയിസ് നോര്‍ട്ടന്റെ കീഴില്‍ മികച്ച പരിശീലനമാണ് നടത്തുന്നത് അതൊന്നും വെറുതെ ആകില്ലെന്നും അമര്ജിത് സിംഗ് പറഞ്ഞു.

ഇന്ത്യന്‍ ടീം ഒരുപാട് പുതിയ പാഠങ്ങള്‍ പഠിച്ചു. അതുകൊണ്ടു തന്നെ എതിരാളികളെ പേടിക്കേണ്ട ആവശ്യമില്ലെന്നും ഇന്ത്യൻ ക്യാപ്റ്റൻ കൂട്ടിച്ചേർത്തു. യുഎസ്എ, കൊളംബിയ, ഘാന എന്നീ ടീമുകള്‍ക്കൊപ്പം എ ഗ്രൂപ്പിലാണ് ഇന്ത്യ. ഒക്ടോബര്‍ ആറിനു യുഎസ്എയുമായാണ് ഇന്ത്യയുടെ ആദ്യ മത്സരം. ഒന്‍പതിന് കൊളംബിയയുമായും 12ന് ഘാനയുമായും ഇന്ത്യ ഏറ്റുമുട്ടും.