ശ്രെഷ്ഠഭാഷാ പദവി നേടിയ മലയാളം ഭാഷ പഠിക്കാൻ ഇനി ഓൺലൈൻ നിഘണ്ടുവും മൊബൈൽ ആപ്പും. ‘ഭരണമലയാളം’ എന്ന പേരിൽ ഔദ്യോഗികഭാഷാ വകുപ്പ് തയ്യാറാക്കിയ ഓൺലൈൻ നിഘണ്ടുവും മൊബൈൽ ആപ്പും മുഖ്യമന്ത്രി പിണറായി വിജയൻ ഉദ്ഘാടനം ചെയ്തു. ഇരുപതിനായിരത്തോളം പദങ്ങളും പ്രയോഗങ്ങളും അവയുടെ ഒട്ടേറെ മലയാളരൂപങ്ങളും ചേര്‍ത്ത് സംസ്ഥാനത്ത് ഭരണഭാഷ സംബന്ധിച്ച ആദ്യ ഓണ്‍ലൈന്‍ നിഘണ്ടുവാണ് ഇത്. http://glossary.kerala.gov.in/ എന്ന പേരിലാണ് ഓണ്‍ലൈന്‍ നിഘണ്ടു തയ്യാറാക്കിയിരിക്കുന്നത്. മുഖ്യമന്ത്രിയുടെ ചേംബറില്‍ നടന്ന ചടങ്ങിലാണ് ഓണ്‍ലൈന്‍ നിഘണ്ടു പുറത്തിറക്കിയത്.
വകുപ്പുതല പദകോശം, ഭരണഭാഷാമാതൃകകള്‍, ടൈപ്പിങ് ഉപകരണങ്ങള്‍ തുടങ്ങിയവയ ഉള്‍പ്പെടുത്തിയിട്ടുണ്ട്. ‘ഭരണമലയാളം’ മൊബൈല്‍ ആപ്പ് ഗൂഗിള്‍ പ്ലേസ്റ്റോറില്‍നിന്ന് ഡൗണ്‍ലോഡ് ചെയ്യാം. ഓൺലൈൻ നിഘണ്ടുവിന് ആവശ്യമായ സാങ്കേതികസഹായം ചെയ്ത എഫ്.ജോസിന് മുഖ്യമന്ത്രി പുരസ്‌കാരം നൽകി. മലയാളം പത്താംക്ളാസ് വരെ നിർബന്ധമാക്കിയതിന് സുഗതകുമാരി ചടങ്ങിൽ മുഖ്യമന്ത്രിക്ക് നന്ദി പറഞ്ഞു. തന്റെ ജീവിതകാലത്ത് ഇതു സഫലമാകുമെന്ന് വിചാരിച്ചതല്ലെന്നും. സാംസ്കാരിക മന്ത്രി എ കെ ബാലന്‍, ഔദ്യോഗികഭാഷ ഉന്നതതലസമിതി അംഗങ്ങളായ സുഗതകുമാരി, ജോര്‍ജ് ഓണക്കൂര്‍, മാധ്യമവിഭാഗം ഉപദേശകന്‍ പ്രഭാവര്‍മ, ഉദ്യോഗസ്ഥ ഭരണപരിഷ്‌കാര (ഔദ്യോഗികഭാഷ) വകുപ്പ് സെക്രട്ടറി കെ.ആര്‍.ജ്യോതിലാല്‍ തുടങ്ങി ഒട്ടേറെ പ്രമുഖർ സന്നിഹിതരായിരുന്നു.