സോഷ്യൽ മീഡിയയുടെയും പൊതുസമൂഹത്തിന്റെയും ഓഡിറ്റിംഗിന് നിരന്തരം വിധേയനായി കൊണ്ടിരിക്കുന്ന​ ഒരാളാണ് ഷൈൻ ടോം ചാക്കോ. ഹേറ്റേഴ്സിന് ഒരു പഞ്ഞവുമില്ലാത്ത ഒരാൾ! എന്നാൽ, ഹേറ്റേഴ്സിനെ പോലും നിശബ്ദരാക്കുന്ന ഒന്നുണ്ട്, അത് ഷൈൻ എന്ന നടനിലെ പ്രതിഭയാണ്. ഭാസിപ്പിള്ളയായി,​ ആൽവിനായി, പീറ്ററായി അയാൾ സ്ക്രീനിൽ തകർത്താടുമ്പോൾ ഒരു യഥാർത്ഥ കലാസ്വാദകന് ആ പ്രകടനം കണ്ട് കയ്യടിക്കാതിരിക്കാനാവില്ല. മമ്മൂട്ടി- അമൽ നീരദ് ടീമിന്റെ ഭീഷ്മപർവ്വത്തിൽ ഗംഭീരമായ അഭിനയം കാഴ്ച്ചവെക്കാൻ താരത്തിന് കഴിഞ്ഞു.

ഇപ്പോഴിതാ ഷൈൻ ടോം ചാക്കോ പ്രധാന വേഷത്തിലെത്തിയ ‘പന്ത്രണ്ട്’ എന്ന സിനിമയുടെ റിലീസിനിടെ തിയേറ്ററിൽ നടന്ന നാടകീയ രംഗങ്ങളാണ് സമൂഹ മാധ്യമത്തിൽ ചർച്ചയാകുന്നത്. ആദ്യ ഷോ കഴിഞ്ഞ് തിയേറ്ററിന് പുറത്തേക്ക് വരുന്ന പ്രേക്ഷകരോട് മാധ്യമ പ്രവർത്തകർ പ്രതികരണം തേടുകയായിരുന്നു. ഈ സമയം മാസ്ക്കും തൊപ്പിയും ധരിച്ച് ഓടിയെത്തിയ നടനെ മാധ്യമ പ്രവർത്തകർ തിരിച്ചറിഞ്ഞു. മാധ്യമപ്രവർത്തകർ ഷൈൻ ടോം ചാക്കോയ്ക്ക് നേർക്ക് തിരിഞ്ഞതോടെ താരം തിയേറ്ററിന് പുറത്തേക്ക് ഓടുകയായിരുന്നു. കാര്യം എന്താണെന്നറിയാതെ ചില മാധ്യമ പ്രവർത്തകരും താരത്തിന്റെ പുറകെ ഓടി. തിയേറ്ററിന് ചുറ്റും ഓടിയ താരം റോ​ഡിലേക്ക് ഇറങ്ങി വീണ്ടും ഓട്ടം തുടർന്നു. ഏതായാലും ഷൈൻ ടോം ചാക്കോയുടെ ഓട്ടം ഇതിനോടകം സോഷ്യൽ മീഡിയയിൽ വൈറലായി കഴിഞ്ഞു.