മലയാളത്തിന്റെ പ്രിയ നടന്‍ ജയറാമിന്റെ മകനും നടനുമായ കാളിദാസ് ജയറാമും മോഡല്‍ തരിണി കലിംഗരായരുമായുള്ള വിവാഹനിശ്ചയം കഴിഞ്ഞു. വിവാഹനിശ്ചയത്തിന്റെ ചിത്രങ്ങളും വീഡിയോയും സോഷ്യല്‍ മീഡിയയിലൂടെ പുറത്തുവന്നതിന് പിന്നാലെയാണ് സംഭവം കൂടുതല്‍ പേര്‍ അറിയുന്നത്. വിവാഹനിശ്ചയത്തെക്കുറിച്ച് മുന്‍പ് താരങ്ങള്‍ സൂചിപ്പിച്ചിരുന്നില്ല. ജയറാം, പര്‍വതി, മാളവിക എന്നിവര്‍ വേദിയില്‍ ഇരിക്കുന്നതും പുറത്തുവന്ന വീഡിയോയില്‍ ഉണ്ട്. നീലഗിരി സ്വദേശിയാണ് 24കാരിയായ തരിണി.

അടുത്തിടെ ഒരു പൊതുവേദിയില്‍ തരിണിയെ താന്‍ വിവാഹം ചെയ്യാന്‍ പോകുന്നുവെന്ന് കാളിദാസ് പറഞ്ഞിരുന്നു. ഷി തമിഴ് അവാര്‍ഡ് നൈറ്റില്‍ തരിണി കലിംഗരായര്‍ക്കൊപ്പം എത്തിയതായിരുന്നു കാളിദാസ് ജയറാം. ബെസ്റ്റ് ഫാഷന്‍ മോഡലിനുള്ള 2023ലെ അവാര്‍ഡ് തരിണിക്കായിരുന്നു. അവാര്‍ഡ് ഏറ്റുവാങ്ങിയ ഉടന്‍ തന്നെ, തരിണിയുടെ നേട്ടത്തിന് പിന്നില്‍ അഭിമാനത്തോടെ ഇരിക്കുന്ന ഒരാളുണ്ടെന്നും ഈ അവസരത്തില്‍ അദ്ദേഹത്തെക്കുറിച്ച് ഇവിടെ പറയാതിരിക്കാന്‍ കഴിയില്ലെന്നും അവതാരക പറയുന്നുണ്ട്. ശേഷം കാളിദാസിനെ വേദിയിലേയ്ക്ക് ക്ഷണിക്കുകയായിരുന്നു.

വേദിയിലെത്തിയ കാളിദാസിനോട് തരിണിയുമായുള്ള ബന്ധം എന്താണെന്ന് അവതാരക ചോദിക്കുന്നു. ഞങ്ങള്‍ വിവാഹം കഴിക്കാന്‍ പോകുന്നുവെന്നായിരുന്നു കാളിദാസിന്റെ മറുപടി. തുടര്‍ന്നാണ് സൂര്യയുടെ ശബ്ദം അനുകരിച്ച് തരിണിയെ പ്രപ്പോസ് ചെയ്തത്. പിന്നീട് തരിണി കലിംഗരായരെ കാളിദാസ് എടുത്തുയര്‍ത്തുന്ന വീഡിയോ പുറത്തുവന്നിരുന്നു.