ജമ്മു കാശ്മീരില്‍ നിയന്ത്രണ രേഖയില്‍ ഇന്ത്യയും പാകിസ്ഥാനും തമ്മിലുള്ള വെടിനിര്‍ത്തല്‍ ഇന്ന് വിജയകരമായി രണ്ട് വര്‍ഷം പൂര്‍ത്തിയാക്കി. ഇരു രാജ്യങ്ങളും തമ്മിലുള്ള ചരിത്രം പരിശോധിക്കുമ്പോള്‍ ഇത്രയും നീണ്ട കാലം അതിര്‍ത്തി ശാന്തമായി തുടര്‍ന്നത് അപൂര്‍വ്വ സാഹചര്യമായാണ് കണക്കാക്കുന്നത്.

ഇന്ത്യയും പാകിസ്ഥാനും തമ്മിലുള്ള ഉഭയകക്ഷി ബന്ധത്തില്‍ കാര്യമായ പുരോഗതി ഉണ്ടായിട്ടില്ലെങ്കിലും വെടിനിര്‍ത്തല്‍ കരാര്‍ കര്‍ശനമായി തന്നെ നിലനിര്‍ത്താന്‍ ഇരു രാജ്യങ്ങളും തീരുമാനിച്ചതോടെ അതിര്‍ത്തി പ്രദേശങ്ങളില്‍ താമസിക്കുന്നവര്‍ക്കും അതൊരു വലിയ അനുഗ്രഹമായി മാറി. കഴിഞ്ഞ കാലങ്ങളില്‍ അടിക്കടി റിപ്പോര്‍ട്ട് ചെയ്തിരുന്ന വെടിവെയ്പിലും ഷെല്ലാക്രമണത്തിലും സൈനികരെ പോലെ തന്നെ പ്രദേശവാസികള്‍ക്കും ജീവന്‍ നഷ്ടമായിരുന്നു.

കഴിഞ്ഞ രണ്ട് വര്‍ഷമായി ജമ്മു കാശ്മീരിലെ അതിര്‍ത്തി കടന്നുള്ള വെടിവെയ്പില്‍ ഇരുഭാഗത്തും ആളപായമൊന്നും റിപ്പോര്‍ട്ട് ചെയ്തിട്ടില്ല. സൈന്യത്തിന്റെ ശക്തമായ പ്രതിരോധ സംവിധാനങ്ങള്‍ നിയന്ത്രണ രേഖയിലൂടെയുള്ള നുഴഞ്ഞുകയറ്റ ശ്രമങ്ങളുടെ എണ്ണം ഗണ്യമായി കുറച്ചിട്ടുണ്ട്. ഇത് മൂലം അതിര്‍ത്തിയിലെ സ്ഥിതിഗതികളില്‍ വലിയ രീതിയിലുള്ള മാറ്റങ്ങളുണ്ടായതായാണ് പ്രദേശവാസികളടക്കം സാക്ഷ്യപ്പെടുത്തുന്നത്. 2020ല്‍ 5,000 വെടിനര്‍ത്തല്‍ കരാര്‍ ലംഘനങ്ങളോ അതിര്‍ത്തി കടന്നുള്ള വെടിവെയ്പുകളോ റിപ്പോര്‍ട്ട് ചെയ്തിരുന്നു. പ്രദേശവാസികള്‍ക്കടക്കം ഇത്തരം സംഭവങ്ങളില്‍ അംഗഭംഗവും മരണവും സംഭവിക്കുകയും വീടുകള്‍ക്ക് കേടുപാടുകളുണ്ടാവുകയും ചെയ്തിട്ടുണ്ട്.

എന്നാല്‍ കഴിഞ്ഞ രണ്ട് വര്‍ഷമായി വെടിനിര്‍ത്തല്‍ കരാര്‍ ലംഘനങ്ങള്‍ ഏതൊന്നും തന്നെ റിപ്പോര്‍ട്ട് ചെയ്തിട്ടില്ല. 2021 ഫെബ്രുവരി 25ന് ഇന്ത്യയും പാകിസ്ഥാനും തമ്മിലുള്ള വെടിനിര്‍ത്തല്‍ കരാറിന് ശേഷം ഇതിന് വിഘാതം സംഭവിക്കുന്ന തരത്തില്‍ മൂന്ന് ചെറിയ സംഭവങ്ങള്‍ മാത്രമേ റിപ്പോര്‍ട്ട് ചെയതിട്ടുള്ളു എന്നാണ് സൈനിക ഉദ്യോഗസ്ഥര്‍ അറിയിക്കുന്നത്. എന്നാല്‍ അതിര്‍ത്തി വഴി ആയുധങ്ങളും മയക്കുമരുന്നും ഡ്രോണുകള്‍ വഴി കടത്തുന്ന സംഭവങ്ങളില്‍ വര്‍ദ്ധനവുണ്ടായതായും സൈന്യം വ്യക്തമാക്കി.