32 രാജ്യങ്ങളും കീഴടക്കി ഇലോണ്‍ മസ്‌ക്.. സ്റ്റാര്‍ലിങ്കിനെ കെട്ടുകെട്ടിച്ച് ഇന്ത്യ പുതിയ നേട്ടവുമായി ഇലോണ്‍ മസ്‌ക്
ലോക കോടീശ്വന്‍ ഇലോണ്‍ മസ്‌കിന്റെ കീഴിലുള്ള സ്‌പേസ് എക്‌സിന്റെ സാറ്റലൈറ്റ് ഇന്റര്‍നെറ്റ് സേവനമായ സ്റ്റാര്‍ലിങ്ക് ഇപ്പോള്‍ 32 രാജ്യങ്ങളില്‍ ലഭ്യമാണെന്ന് പ്രഖ്യാപിച്ചു. ലഭ്യതയുടെ വിശദാംശങ്ങള്‍ വ്യക്തമാക്കുന്ന ട്വീറ്റും പോസ്റ്റ് ചെയ്തിട്ടുണ്ട്. കഴിഞ്ഞ കുറച്ച് മാസങ്ങളായി സ്റ്റാര്‍ലിങ്കിന്റെ സേവനങ്ങള്‍ ലോകത്തിന്റെ പ്രധാന ഭാഗങ്ങളിലേക്ക് എത്തിക്കുന്നതില്‍ നിരവധി പ്രശ്‌നങ്ങള്‍ നേരിടുന്നുണ്ട്. എന്നാല്‍, മസ്‌കിന്റെ ബഹിരാകാശ കമ്പനി ഈ പ്രശ്‌നങ്ങളെല്ലാം പരിഹരിക്കാന്‍ ശ്രമിക്കുന്നുണ്ടെന്നാണ് റിപ്പോര്‍ട്ട്.
ലോകമെമ്പാടുമുള്ള സാറ്റലൈറ്റ് ഇന്റര്‍നെറ്റ് സേവനത്തിന്റെ ലഭ്യത കാണിക്കുന്ന മാപ്പ് സ്റ്റാര്‍ലിങ്ക് ട്വിറ്ററില്‍ പങ്കിട്ടു. യൂറോപ്പിലെയും വടക്കേ അമേരിക്കയിലെയും മിക്ക ഭാഗങ്ങളിലും സേവനം ലഭ്യമാണെന്ന് മാപ്പില്‍ കാണിക്കുന്നുണ്ട്. തെക്കേ അമേരിക്ക, ഓസ്‌ട്രേലിയ, ന്യൂസീലന്‍ഡ് എന്നിവയുടെ ചില ഭാഗങ്ങളില്‍ സേവനം ഉടന്‍ ലഭിക്കുമെന്നും മാപ്പില്‍ നിന്നു മനസിലാക്കാം.
ഉടനടി സേവനം ലഭിക്കുന്ന രാജ്യങ്ങളുടെ പട്ടികയില്‍ ഇന്ത്യ ഉള്‍പ്പെടുന്നില്ല. എന്നാല്‍ 'ഉടന്‍ വരുന്നു' എന്ന നീല നിറത്തിലാണ് ഇന്ത്യ അടയാളപ്പെടുത്തിയിരിക്കുന്നത്. 25 രാജ്യങ്ങളില്‍ സ്റ്റാര്‍ലിങ്ക് സേവനം ലഭ്യമാകുമെന്ന് കമ്പനി നേരത്തേ പറഞ്ഞിരുന്നുവെങ്കിലും ആ പട്ടിക ഇപ്പോള്‍ 32 രാജ്യങ്ങളിലേക്ക് വ്യാപിപ്പിച്ചിട്ടുണ്ട്.
സ്റ്റാര്‍ലിങ്കിന്റെ പ്രധാന വിപണികളിലൊന്നായാണ് ഇന്ത്യയെ ആദ്യം കണക്കാക്കിയിരുന്നത്. കഴിഞ്ഞ വര്‍ഷം ഇന്ത്യയിലെ ഉപയോക്താക്കള്‍ക്കായി പ്രീഓര്‍ഡറുകള്‍ പോലും ആരംഭിച്ചു. എന്നാല്‍, ബുക്കിങ് ആരംഭിക്കുന്നതിന് മുന്‍പ് സ്റ്റാര്‍ലിങ്കിന്റെ സേവനങ്ങള്‍ക്ക് സര്‍ക്കാരില്‍ നിന്ന് ലൈസന്‍സ് നേടണമെന്ന് അറിയിച്ചതിനെത്തുടര്‍ന്ന് നവംബറില്‍ അത് താല്‍ക്കാലികമായി നിര്‍ത്തിവച്ചു.
സര്‍ക്കാര്‍ മുന്നറിയിപ്പിനെ തുടര്‍ന്ന് സ്റ്റാര്‍ലിങ്കിന്റെ സേവനങ്ങള്‍ മുന്‍കൂട്ടി ഓര്‍ഡര്‍ ചെയ്ത ഉപഭോക്താക്കള്‍ക്ക് റീഫണ്ട് നല്‍കാന്‍ തുടങ്ങി. രാജ്യത്ത് 5,000ത്തിലധികം പ്രീഓര്‍ഡറുകള്‍ ലഭിച്ചതായും കമ്പനി അവകാശപ്പെട്ടു. പിന്നീട്, ജനുവരിയില്‍ സ്റ്റാര്‍ലിങ്കിന്റെ ഇന്ത്യാ മേധാവി സഞ്ജയ് ഭാര്‍ഗവ കമ്പനി വിടുകയും ചെയ്തു.
https://www.facebook.com/Malayalivartha
