വേണാട് എക്‌സ്പ്രസിന്റെ പുതിയ കോച്ചുകള്‍ സാമൂഹിക വിരുദ്ധര്‍ കുത്തിക്കീറി നശിപ്പിച്ചു. ആധുനിക കോച്ചുകളുടെ സീറ്റുകള്‍ കുത്തിക്കീറിയും സീറ്റ് ലിവറുകള്‍ കേടു വരുത്തിയുമാണ് അഴിഞ്ഞാട്ടം. ചില സീറ്റുകളുടെ മുന്‍വശം മൂര്‍ച്ചയേറിയ ഉപകരണം ഉപയോഗിച്ചു കുത്തിക്കീറിയ നിലയിലാണ്. പുഷ്ബാക്ക് സീറ്റിന്റെ ലിവറുകളും കേടു വരുത്തിയിട്ടുണ്ട്. ആധുനിക ലിങ്ക് ഹോഫ്മാന്‍ ബുഷ് (എല്‍എച്ച്ബി) റേക്കുമായി നവംബര്‍ ഏഴ് മുതലാണ് വേണാട് എക്‌സ്പ്രസ് ഷൊര്‍ണൂര്‍ തിരുവനന്തപുരം പാതയില്‍ സര്‍വീസ് നടത്തുന്നത്. സീറ്റും മറ്റും നശിപ്പിക്കപ്പെട്ടതായി കഴിഞ്ഞ ദിവസമാണ് ശ്രദ്ധയില്‍പ്പെട്ടത്. ഇതു സംബന്ധിച്ചു റെയില്‍വേ റിപ്പോര്‍ട്ട് തേടിയിട്ടുണ്ട്. ആരാണ് നാശം വരുത്തിയതെന്നു കണ്ടെത്താനായിട്ടില്ല.

വേണാടിന്റെ കോച്ചില്‍ വരുത്തിയ നാശനഷ്ടം സാമൂഹിക മാധ്യമങ്ങളിലും ചര്‍ച്ചയായി. മികച്ച സൗകര്യങ്ങള്‍ ഉള്ള കോച്ചില്‍ നാശം വരുത്തിയതില്‍ പ്രതിഷേധം ഉയരുന്നുണ്ട്. സര്‍വീസ് ആരംഭിച്ച ആദ്യ ദിവസങ്ങളില്‍ത്തന്നെ കോച്ചുകളില്‍ കേടുപാടുകള്‍ വരുത്തിയെന്നാണ് റെയില്‍വേ അധികൃതരുടെ നിഗമനം. കേരളത്തിനു ലഭിച്ച ആധുനിക ത്രീഫേസ് മെമുവില്‍ ആദ്യ ദിനം തന്നെ മോഷണം നടന്നിരുന്നു. അതിന് പിന്നാലെയാണ് വേണാട് എക്‌സ്പ്രസിലെ ആധുനിക കോച്ചുകളുടെ സീറ്റുകള്‍ കിത്തിക്കീറിയും മറ്റും നാശം വരുത്തിയിരിക്കുന്നത്.