പുന്നമട കായല്‍ സ്വന്തമാക്കിയിട്ടും സ്വന്തം പാര്‍ട്ടിയുടെ സംസ്ഥാന പ്രസിഡന്റിനെ മാനസികമായി പീഡിപ്പിച്ചിട്ടും തോമസ് ചാണ്ടിയെ സംരക്ഷിക്കാന്‍ സി പി എം രഹസ്യ തീരുമാനം. പാര്‍ട്ടി സംസ്ഥാന സെക്രട്ടറി കോടിയേരി ബാലകൃഷ്ണനാണ് കുവൈറ്റ് ചാണ്ടി എന്ന തോമസ് ചാണ്ടിയുടെ കായല്‍ കൈയ്യേറ്റം അറിഞ്ഞില്ലെന്നാണ് പറയുന്നത്. മുഖ്യമന്ത്രി പിണറായി വിജയന്‍ ഇതുവരെയും നിലപാട് വ്യക്തമാക്കിയിട്ടില്ല.

സി പി എംനെയും സര്‍ക്കാറിനെയും വന്‍ പ്രതിസന്ധിയിലാക്കി കൊണ്ടാണ് തോമസ് ചാണ്ടിക്കെതിരായ ആരോപണങ്ങള്‍ മാധ്യമങ്ങള്‍ ഏറ്റുപിടിച്ചത്. സ്വന്തം റിസോര്‍ട്ടിലേക്കുള്ള റോഡുകള്‍ സര്‍ക്കാര്‍ ചെലവില്‍ ടാര്‍ ചെയ്തും റിസോര്‍ട്ടിന് സമീപമുള്ള ഭൂമി മണ്ണിട്ട് നികത്തിയും തോമസ് ചാണ്ടി നിയമ ലംഘനങ്ങള്‍ തുടരവേ സിപി എമ്മോ സര്‍ക്കാരോ കണ്ട മട്ട് കാണിക്കുന്നില്ല. വിഷയത്തെ കുറിച്ച് പ്രതികരണം ആരാഞ്ഞ പത്രലേഖകരോട് താന്‍ ഇക്കാര്യം അറിഞ്ഞിട്ടില്ലെന്നാണ് കോടിയേരി ബാലകൃഷ്ണന്‍ പറഞ്ഞത്.

പിണറായി വിജയന്‍ ഇക്കാര്യത്തില്‍ നിലപാട് വ്യക്തമാക്കിയിട്ടില്ല. പിണറായിയോട് ആരും അഭിപ്രായം ചോദിച്ചിട്ടില്ല. അഭിപ്രായം ചോദിച്ചാല്‍ ആദ്ദേഹം പറയാറില്ല.

തോമസ് ചാണ്ടിയുടെ കായല്‍ കൈയേറ്റത്തിനെ കുറിച്ച് അന്വേഷിക്കണമെന്ന് കോണ്‍ഗ്രസില്‍ നിന്നും വി.എം.സുധീരന്‍ മാത്രമാണ് ആവശ്യപ്പെട്ടത്. ചെന്നിത്തല കമാന്ന് ഒരക്ഷരം മിണ്ടിയില്ല. കോണ്‍ഗ്രസില്‍ നിന്നും ഇനിയാരെങ്കിലും ശബ്ദിക്കുമെന്ന് പറയാനുമാവില്ല.

എന്‍ സി പി സംസ്ഥാന പ്രസിഡന്റ് ഉഴവൂര്‍ വിജയന്റ മരണവുമായി ബന്ധപ്പെട്ട വിവാദം വിരല്‍ ചൂണ്ടുന്നത് തോമസ് ചാണ്ടിയിലേക്കാണ്. കേരള അഗ്രോ ഇന്‍ഡസ്ട്രീസ് കോര്‍പ്പറേഷന്‍ ചെയര്‍മാന്‍ സുല്‍ഫിക്കര്‍ മയൂരിയാണ് ഉഴവൂര്‍ വിജയനെ മാനസികമായി പീഡിപ്പിച്ചത്. മയൂരി തോമസ് ചാണ്ടിയുടെ വിശ്വസ്തനാണ്. എന്‍ സി പി സംസ്ഥാന പ്രസിഡന്റ് സ്ഥാനത്ത് നിന്നും വിജയനെ മാറ്റുകയായിരുന്നു ചാണ്ടിയുടെ ലക്ഷ്യം.

അഴിമതിക്കെതിരെ ശക്തമായ നിലപാട് സ്വീകരിക്കുന്ന മന്ത്രി ജി.സുധാകരന്‍ പോലും ഒരക്ഷരം ഇക്കാര്യത്തില്‍ പറഞ്ഞിട്ടില്ല. ആലപ്പുഴയുടെ സ്വന്തം മന്ത്രി തോമസ് ഐസക്കും നിശബ്ദത തുടരുന്നു. അതിനിടെ ഇത് സംബന്ധിച്ച് പ്രതികരിക്കണമെന്നു പറഞ്ഞ സി പി എമ്മുകാരോട് ഒരു പ്രതികരണവും വേണ്ടെന്നാണ് ജില്ലാ നേതൃത്വം പറഞ്ഞത്. പിണറായി മന്ത്രിസഭയിലെ ഒരു മന്ത്രിക്കെതിരെ സി പി എം രംഗത്തിറങ്ങിയാല്‍ അത് പാര്‍ട്ടിക്ക് കളങ്കമാകുമെന്നാണ് ജില്ലാ നേതൃത്വത്തിന്റെ അഭിപ്രായം.

എന്നാല്‍ വാസ്തവം ഇതൊന്നുമല്ല. കുവൈറ്റ് ചാണ്ടിയാണ് എല്‍ഡിഎഫിന്റെ ഫണ്ട് റയ്‌സര്‍. ഏതു പാതിരാത്രിക്ക് ചോദിച്ചാലും അദ്ദേഹം പണം എറിയും. ഇല്ലെങ്കില്‍ കെ.കരുണാകരനൊപ്പം നിന്ന തോമസ് ചാണ്ടി ഇടതു മന്ത്രിസഭയില്‍ മന്ത്രിയാകുമോ? ചാണ്ടിയെ മന്ത്രിയാക്കാതിരിക്കാന്‍ പിണറായി കൊളുത്തിയ തിരി ഊതി കെടുത്തിയതും കോടിയേരിയായിരുന്നു. പണവും പ്രതാപവും ഉള്ളിടത്തോളം കാലം ചാണ്ടി പ്രഭാവലയമായി തുടരും.