വാഹനങ്ങളെ പിന്തുടര്ന്ന് പിടികൂടരുത്,സ്ത്രീകളെയും കുട്ടികളെയും ഒഴിവാക്കണം;വാഹന പരിശോധനയില് നിബന്ധനകളുമായി പുതിയ സര്ക്കുലര്
പോലീസിന്റെ വാഹന പരിശോധനയ്ക്കിടെയുണ്ടാകുന്ന അപകടങ്ങളും പരാതികളും പരിഗണിച്ച് പോലീസിനായി പുതിയ നിര്ദേശങ്ങള് സര്ക്കാര് പുറത്തിറക്കി. സ്ത്രീകളും കുട്ടികളുമായി പോകുന്ന വാഹനങ്ങളെ പരിശോധനയില് നിന്ന് ഒഴിവാക്കണമെന്നാണ് നിര്ദേശങ്ങളില് പ്രധാനപ്പെട്ടത്. നിര്ത്താതെ പോകുന്ന വാഹനങ്ങളെ സിനിമാസ്റ്റൈലില് പിന്തുടര്ന്ന് പിടികൂടുന്നത് അവസാനിപ്പിക്കണമെന്നും സോണല് എ.ഡി.ജി.പിമാര് ഉദ്യോഗസ്ഥര്ക്ക് നല്കിയ നിര്ദേശത്തില് വ്യക്തമാക്കുന്നു.
പ്രധാന നിര്ദേശങ്ങള് ഇതൊക്കെയാണ്...
1. സ്ത്രീകളും കുട്ടികളും ഉള്പ്പെടുന്ന വാഹനങ്ങളെ പരിശോധയ്ക്കിടെ സ്റ്റേഷനിലേക്ക് കൊണ്ടുപോകാന് പാടില്ല. ഗതാഗത നിയമലംഘനമുണ്ടെങ്കില് സംഭവസ്ഥലത്ത് തന്നെ നോട്ടീസ് നല്കി നടപടിയെടുക്കാം.
2. മദ്യപിച്ച് വണ്ടിയോടിക്കുന്നതിന് പിടികൂടിയവരെ വൈദ്യപരിശോധനയ്ക്ക് ശേഷം മാത്രമേ സ്റ്റേഷനിലേക്ക് കൊണ്ടു പോകാവൂ. സ്റ്റേഷനിലെത്തിച്ച് ഒരു മണിക്കൂറിനകം ജാമ്യത്തില് വിടണം.
3. ജാമ്യക്കാരില്ലാത്തവരാണെങ്കില് പിടികൂടിയ വാഹനം സ്റ്റേഷനില് സൂക്ഷിക്കണം.
4. അവധി ദിനങ്ങളുടെ തലേദിവസമാണ് കുറ്റകൃത്യങ്ങള് വര്ധിക്കുന്നത് എന്നതിനാല്, ആ ദിവസങ്ങളില് രാവിലെ 11 മണി മുതല് നാല് വരെ പരിശോധന നടത്തണം എന്നും നിര്ദേശങ്ങളില് പറയുന്നു.
https://www.facebook.com/Malayalivartha
