എന്‍സിപിയുടെ ഗതാഗത മന്ത്രി തോമസ് ചാണ്ടിയുടെ അഴിമതി ചോദ്യം ചെയ്ത യുവനേതാവിനെ എന്‍സിപി പുറത്താക്കി. തോമസ് ചാണ്ടിയുടെ ഹോട്ടല്‍ കയ്യേറ്റം സംബന്ധിച്ച വാര്‍ത്ത പുറത്തുവന്നതിനെ തുടര്‍ന്ന് മന്ത്രി രാജിവെയ്ക്കണമെന്ന് ആവശ്യപ്പെട്ട എന്‍സിപിയുടെ യുവജനവിഭാഗം എന്‍വൈസിയുടെ പ്രസിഡന്റായിരുന്ന മുജീബ് റഹ്മാനെയാണ് പുറത്താക്കിയത്. മന്ത്രിക്കെതിരെ സംസാരിച്ചതിന് പിന്നാലെയാണ് പ്രതികാര നടപടി. എന്‍വൈസി ദേശീയ അധ്യക്ഷന്‍ രാജീവ് കുമാര്‍ ഝായാണ് നടപടി കൈക്കൊണ്ടത്.
എന്‍വൈസി സംസ്ഥാന കമ്മിറ്റി പിരിച്ചുവിട്ടതായും ദേശീയ നേതൃത്വം അറിയിച്ചു.
തോമസ് ചാണ്ടി രാജിവെക്കണമെന്ന് എന്‍സിപിയിലെ ഒരുവിഭാഗം നേതാക്കള്‍ ആവശ്യപ്പെട്ടിരുന്നു. എട്ട് ജില്ലാ പ്രസിഡന്റുമാരാണ് ആവശ്യമുന്നയിച്ചത്. ചാണ്ടിയുടെ നിയമലംഘനം സര്‍ക്കാര്‍ തലത്തിലും പാര്‍ട്ടി തലത്തിലും അന്വേഷിക്കണം. നടപടി ഉണ്ടായില്ലെങ്കില്‍ കടുത്ത നടപടിയിലേക്ക് പോകുമെന്നും വിമതപക്ഷം പറഞ്ഞിരുന്നു. എന്‍സിപിയിലെ ഒരു വിഭാഗം നേതാക്കള്‍ കൊച്ചിയില്‍ യോഗം ചേര്‍ന്നിരുന്നു, ഈ യോഗത്തിലാണ് തോമസ് ചാണ്ടിയുടെ രാജി ആവശ്യം ഉയര്‍ന്നത്. നേതാക്കളെ ഒതുക്കി നിര്‍ത്താനാണ് നിലവിലെ പുറത്താക്കല്‍ നടപടി.
തനിക്കെതിരായ കയ്യേറ്റ ആരോപണം തെളിയിച്ചാല്‍ രാജിവെക്കുമെന്ന് മന്ത്രി തോമസ് ചാണ്ടി ഇന്നലെ നിയമസഭയില്‍ പറഞ്ഞിരുന്നു. മന്ത്രിക്കെതിരായ ആരോപണങ്ങള്‍ അടിസ്ഥാനരഹിതമെന്ന് മുഖ്യമന്ത്രിയും സഭയില്‍ പറഞ്ഞിരുന്നു. റിസോര്‍ട്ടിനായി മന്ത്രി പുന്നമടക്കായല്‍ കൈയ്യേറിയിട്ടില്ല. ലേക്ക് പാലസ് 15 വര്‍ഷം മുമ്പ് തുടങ്ങിയതാണെന്നും മുഖ്യമന്ത്രി പറഞ്ഞു. റിസോര്‍ട്ടിലേക്കുളള റോഡിന് ഫണ്ട് അനുവദിച്ചത് രണ്ട് എംപിമാരാണെന്നും അദ്ദേഹം പറഞ്ഞു.