കെ.എസ്.ആര്‍.ടി.സി പെന്‍ഷന്‍കാര്‍ക്ക് ആയിരം രൂപ വീതം ഉത്സവബത്തയായി നല്‍കാന്‍ കോര്‍പ്പറേഷന്‍ തീരുമാനിച്ചു. ഇതുവരെ മൂന്നു മാസത്തെ പെന്‍ഷന്‍ കുടിശിക വിതരണം ചെയ്യാനിരിക്കെയാണ് സര്‍ക്കാര്‍ നിര്‍ദേശ പ്രകാരം കോര്‍പ്പറേഷന്‍ പുതിയ തീരുമാനമെടുത്തത്. കഴിഞ്ഞ തവണ ഓണക്കാലത്ത് 750 രൂപയായിരുന്നു. ഇതിനായി നാലു കോടി രൂപ അധികമായി കണ്ടെത്തണം.

ശമ്പളം വാങ്ങാന്‍ പോലും വായ്പ എടുക്കുന്ന കോര്‍പ്പറേഷന്‍ ഈ തുക എങ്ങനെ കണ്ടെത്തും. വായ്പ കിട്ടുന്നതിനായി അപേക്ഷ നല്‍കിയിട്ടുണ്ട് കിട്ടിയാല്‍ പെന്‍ഷനും കൊടുക്കും ഉത്സവബത്തയും നല്‍കും.

പെന്‍ഷന്‍ കാര്യത്തില്‍ കെ.എസ്.ആര്‍.ടി.സിയുടേയും സര്‍ക്കാരിന്റേയും ഉറപ്പുകള്‍ പലതുകണ്ടാണ് കോര്‍പ്പറേഷനില്‍ നിന്നും വിരമിച്ചവര്‍. കുറുപ്പിന്റെ ഉറപ്പിന്റെ ബലം പോലും കോര്‍പ്പറേഷന്റെ ഉറപ്പിന് ഇല്ലെന്ന് ഓരോ പെന്‍ഷന്‍കാരും സ്വന്തം അനുഭവം പറഞ്ഞ് ഉദാഹരിച്ചുകളയും.

മേയ്, ജൂണ്‍ മാസങ്ങളില്‍ വിതരണം ചെയ്തത് പകുതി പെന്‍ഷന്‍. ജൂലായ്, ആഗസ്റ്റ് മാസങ്ങളിലെ പെന്‍ഷന്‍ തുകയില്‍ നിന്നും ഒരു രൂപ പോലും ഇതുവരെ വിതരണം ചെയ്തിട്ടില്ല. കിട്ടാനുള്ളതെല്ലാം ബാക്കി വയ്ക്കാതെ ഓണത്തിനു മുമ്പ് കിട്ടിയാല്‍ തന്നെ പെന്‍ഷന്‍കാര്‍ ഹാപ്പിയാണ്. എന്നാല്‍ ആ കാര്യത്തില്‍ ഒരു ഉറപ്പും നല്‍കാന്‍ കോര്‍പ്പറേഷനും കഴിയില്ല, ഗതാഗത വകുപ്പിനും കഴിയില്ല.

പാലക്കാട്, പത്തനംതിട്ട ജില്ലാ സഹകരണ ബാങ്കുകളില്‍ നിന്നും 170 കോടിരൂപയുടെ വായ്പയ്ക്കാണ് കെ.എസ്.ആര്‍.ടി.സി സമീപിച്ചിരിക്കുന്നത്. 130 കോടി രൂപ പ്രതീക്ഷിക്കുന്നത് പാലക്കാട് നിന്നാണ്. നിലവിലെ കുടിശിക തീര്‍ക്കാന്‍ മാത്രം 171 കോടി രൂപ വേണം. അതില്‍ രണ്ടു മാസത്തെ സര്‍ക്കാര്‍ വിഹിതം ലഭിച്ചാല്‍ 60 കോടി ലാഭിക്കാം. എന്നാല്‍ ഈ തുകയില്‍ നിന്നും ശമ്പളത്തിനുള്ള വക കൂടി നീക്കിയാല്‍ പെന്‍ഷന്‍ കുടുശിക മുഴുവന്‍ കൊടുത്തു തീര്‍ക്കാനും കഴിയില്ല.