ബിജെപി നേതാവിന്റെ മണിമാളികയ്ക്ക് മുന്നില്‍ 'നരേന്ദ്രമോഡി ഈ വീടിന്റെ ഐശ്വര്യം' എന്നെഴുതിയ ബോര്‍ഡ് സ്ഥാപിച്ചു. ദേശാഭിമാനിയാണ് ഈ വാര്‍ത്ത നല്‍കിയിരിക്കുന്നത്. ശനിയാഴ്ച രാവിലെയാണ് ബിജെപി നേതാവും മെഡിക്കല്‍ കോഴക്കേസില്‍ സ്ഥാനഭ്രഷ്ടനാക്കപ്പെട്ട വി വി രാജേഷിന്റെ വഞ്ചിയൂരിലെ വീടിനുമുന്നില്‍ ജനകീയപ്രതികരണവേദിയുടെ പേരില്‍ ബോര്‍ഡ് സ്ഥാപിക്കപ്പെട്ടതെന്നാണ് ദേശാഭിമാനി പറയുന്നത്. 

2011ല്‍ നെടുമങ്ങാട് മണ്ഡലത്തില്‍ ബിജെപി സ്ഥാനാര്‍ഥിയായി നിയമസഭയിലേക്ക് മത്സരിക്കുമ്പോള്‍ 27 ലക്ഷം രൂപയുടെ ആസ്തിയും 4.9 ലക്ഷത്തിന്റെ ബാധ്യതയും ഉണ്ടെന്ന് തെരഞ്ഞെടുപ്പ് കമീഷനെ ബോധിപ്പിച്ച വി വി രാജേഷിന് സ്ഥിരവരുമാനമോ തൊഴിലോ ഇല്ലാതെ അഞ്ചുവര്‍ഷംകൊണ്ട് എങ്ങനെ നഗരഹൃദയത്തില്‍ കോടികള്‍ വിലമതിക്കുന്ന വീട് സ്വന്തമായി എന്നാണ് ബോര്‍ഡിലെ ചോദ്യം. ബിജെപിയിലെ ഒരു വിഭാഗത്തിന് ബോര്‍ഡുമായി ബന്ധമുണ്ടെന്നാണ് സൂചന.

ബിജെപി നേതാക്കളുടെ മെഡിക്കല്‍ കോളേജ് കോഴ ഇടപാടുമായി ബന്ധപ്പെട്ട് ബിജെപി ജനറല്‍സെക്രട്ടറി സ്ഥാനത്തുനിന്ന് വി വി രാജേഷിനെ അടുത്തിടെ നീക്കി. പാര്‍ടിയിലെ എതിര്‍ചേരി നേതാക്കള്‍ ഉള്‍പ്പെട്ട 5.6 കോടി രൂപയുടെ മെഡിക്കല്‍ കോഴ ഇടപാടിനെക്കുറിച്ച് പാര്‍ടിതലത്തിലുള്ള അന്വേഷണ റിപ്പോര്‍ട്ട് മാധ്യമങ്ങള്‍ക്ക് രാജേഷ് ആണ് ചോര്‍ത്തിയെതെന്നു പറഞ്ഞാണ് ജനറല്‍ സെക്രട്ടറി സ്ഥാനത്തുനിന്ന് നീക്കിയത്. മെഡിക്കല്‍ കോഴ വിവാദം ഉയര്‍ന്നപ്പോള്‍ സേവ് ബിജെപിയുടെ പേരില്‍ പ്രചരിപ്പിച്ച നോട്ടീസുകളിലും രാജേഷിന്റെ അനധികൃത സ്വത്ത് സമ്പാദനത്തെക്കുറിച്ച് വിശദവിരങ്ങളുണ്ടായിരുന്നു.