കൊച്ചി വീണ്ടും വാര്‍ത്തകളില്‍ നിറയുന്നു. കൊച്ചി നഗരത്തില്‍ യുവതി ആക്രമിക്കപ്പെട്ട സംഭവത്തില്‍ കേസെടുക്കാതെ പൊലീസിന്റെ ഒളിച്ചുകളി. മൂന്നാഴ്ച മുന്‍പുണ്ടായ സംഭവത്തില്‍ യുവതിക്ക് പരാതിയില്ല എന്നാണ് പൊലീസ് ഭാഷ്യം. അക്രമികളുമായി പൊലീസ് ഒത്തുകളിക്കുകയാണെന്ന് ആരോപിച്ച് യുവതിയുടെ ഭര്‍ത്താവ് ഐജിക്ക് പരാതി നല്‍കി. യുവതി ഇപ്പോഴും അക്രമികളുടെ തടങ്കലിലാണെന്നും ജീവന് ഭീഷണിയുണ്ടെന്നും ഭര്‍ത്താവ് പറയുന്നു. 
ഭര്‍ത്താവുമായി അകന്നുകഴിയുന്ന പത്തനംതിട്ട സ്വദേശിയായ യുവതിയെ ഇക്കഴിഞ്ഞ മാസം 28ന് അര്‍ധരാത്രിയാണ് കൊച്ചിയിലെ സ്വകാര്യ ആശൂപത്രിയില്‍ എത്തിച്ചത്. ശരീരമാസകലം പരുക്കുകളുണ്ടായിരുന്നു. കയ്യില്‍ മൂര്‍ച്ചയുളള ആയുധം കൊണ്ടുണ്ടായ മുറിവും. അമിതായി മദ്യം ഉള്ളില്‍ ചെന്നിരുന്നു. ഇത് കുടിപ്പിച്ചതാണെന്ന് സംശയിക്കാന്‍ പാകത്തില്‍ കവിളിന് ഇരുവശവും ബലപ്രയോഗത്തിന്റെ അടയാളവും. ഇത്രയും കണ്ടെത്തിയതോടെ ആശൂപത്രിയില്‍ നിന്ന് വിവരമറിയിച്ച് മരട് പൊലീസെത്തി യുവതിയുടെ മൊഴി രേഖപ്പെടുത്തി. മൂന്നാഴ്ചയായിട്ടും കേസ് റജിസ്റ്റര്‍ ചെയ്തിട്ടില്ല. വിവരമറിഞ്ഞെത്തിയ ഭര്‍ത്താവിനോട് തനിക്ക് പരാതിയില്ലെന്നും കേസെടുക്കേണ്ടെന്നും യുവതി പറഞ്ഞുവെന്നാണ് പൊലീസിന്റെ വിശദീകരണം.

താനുമായി അകന്ന ശേഷം ഒപ്പം താമസിക്കുന്നയാളാണ് യുവതിയെ ക്രൂരമായി ആക്രമിച്ചതെന്ന് ഭര്‍ത്താവ് പറയുന്നു. യുവതിയുമായി മുന്‍പെ അടുപ്പമുള്ള ഒരു പൊലീസ് ഉദ്യോഗസ്ഥന്‍ കേസ് ഇല്ലാതാക്കാന്‍ ഇടപെടുന്നുണ്ട്. ഇവരുടെ ഭീഷണിയിലാകാം പരാതിയില്ല എന്ന് പറയുന്നത്.