മുന്‍ഗണനാ വിഭാഗത്തില്‍ ഉള്‍പ്പെട്ട സര്‍ക്കാര്‍ ഉദ്യോഗസ്ഥരും അദ്ധ്യാപകരുമടക്കം 75,482 പേര്‍ റേഷന്‍ കാര്‍ഡുകള്‍ സറണ്ടര്‍ ചെയ്തതായി മന്ത്രി പി.തിലോത്തമന്‍ അറിയിച്ചു. സറണ്ടര്‍ ചെയ്യുന്നതിനുള്ള സമയപരിധി സെപ്തംബര്‍ 15വരെ നീട്ടിയിട്ടുണ്ട്. മുന്‍ഗണനാപട്ടിക തുടര്‍ച്ചയായ പുനരവലോകനത്തിനു വിധേയമാണ്. മുന്‍ഗണനാപട്ടികയില്‍ ഉള്‍പ്പെടുത്തുന്നതിന് 6.12 ലക്ഷം അപേക്ഷകള്‍ ലഭിച്ചിട്ടുണ്ട്. റേഷന്‍ കടകളില്‍ ബയോമെട്രിക് സംവിധാനം അടുത്ത മാര്‍ച്ചോടെ നടപ്പാക്കും. മാവേലി സ്‌റ്റോറില്ലാത്ത 30 പഞ്ചായത്തുകളില്‍ ഇക്കൊല്ലം ഔട്ട്‌ലെറ്റുകള്‍ ആരംഭിക്കുമെന്നും മന്ത്രി പറഞ്ഞു.

ആന്ധ്രയില്‍ നിന്ന് ആവശ്യത്തിന് അരിയെത്തിക്കുന്നതിനാല്‍ ഓണക്കാലത്ത് അരിക്ഷാമമോ വിലക്കയറ്റമോ ഉണ്ടാവില്ല. വിപണി ഇടപെടലിന്റെ ഭാഗമായി ജില്ലാ ഫെയറുകള്‍ ആരംഭിച്ചിട്ടുണ്ട്. താലൂക്ക്തല ഫെയറുകളും പ്രത്യേക ഓണച്ചന്തകളും ഉടന്‍ ആരംഭിക്കും. സപ്ലൈകോ വില്‍പനശാലകളോട് ചേര്‍ന്ന് ഓണം ഫെയറുകളും വില്‍പനശാലകള്‍ ഇല്ലാത്ത പഞ്ചായത്തുകളില്‍ സ്‌പെഷ്യല്‍ മിനിഫെയറുകളും നടത്തും. സപ്ലൈകോയില്‍ ഓണ്‍ലൈന്‍ വില്‍പന നടപ്പാക്കുന്നത് പരിഗണിക്കുമെന്നും മന്ത്രി പറഞ്ഞു.

സര്‍ക്കാര്‍ ഗ്രാന്റ് ലഭിക്കുന്ന 228 വൃദ്ധസദനങ്ങളിലായി 8775 വയോജനങ്ങളും 682 ശിശുമന്ദിരങ്ങളിലായി 28811 കുട്ടികളുമുണ്ടെന്ന് മന്ത്രി കെ.കെ.ശൈലജ സഭയെ അറിയിച്ചു. കേന്ദ്രസഹായത്തോടെ എറണാകുളം ജനറല്‍ ആശുപത്രി, കണ്ണൂര്‍ ജില്ലാ ആശുപത്രി എന്നിവിടങ്ങളില്‍ ട്രോമാകെയര്‍ തുടങ്ങും. തിരുവനന്തപുരം, കോട്ടയം, തൃശൂര്‍ മെഡിക്കല്‍ കോളജുകളില്‍ സംസ്ഥാന ഫണ്ട് ഉപയോഗിച്ച് ട്രോമാകെയര്‍ ഏര്‍പ്പെടുത്തുമെന്നും മന്ത്രി പറഞ്ഞു

.

മഴക്കുറവും വരള്‍ച്ചയും കാരണം 45,399 ഹെക്ടറില്‍ 875 കോടിയുടെ കൃഷിനാശമുണ്ടായതായി മന്ത്രി വി.എസ്.സുനില്‍കുമാര്‍ സഭയെ അറിയിച്ചു. 1.79 ലക്ഷം കര്‍ഷകര്‍ ദുരിതത്തിലായി. വയനാട്ടില്‍ ചക്ക പള്‍പ്പ് നിര്‍മാണ യൂണിറ്റ് തുടങ്ങുമെന്നും മന്ത്രി പറഞ്ഞു.