തോന്നയ്ക്കൽ എ.ജെ കോളേജിലെ വിദ്യാർത്ഥിക്ക് വെട്ടേറ്റു. രണ്ടാംവർഷ ബി.കോം വിദ്യാർത്ഥിയായ ശ്രീനിതിനാണ് വെട്ടേറ്റത്. ആദ്യം സ്വകാര്യ ആശുപത്രിയിൽ പ്രവേശിപ്പിച്ച ശ്രീനിതിനെ പിന്നീട് മെഡിക്കൽ കോളേജ് ആശുപത്രിയിലേക്ക് മാറ്റി. ഉച്ചയോടെയായിരുന്നു സംഭവം. ഭക്ഷണം കഴിക്കുന്നതിനു വേണ്ടി കോളേജിനു പുറത്തു പോയപ്പോൾ ബൈക്കിൽ എത്തിയ മൂന്നംഗ സംഘമാണ് നിതിനെ വെട്ടിയതെന്ന് സഹപാഠികൾ പറഞ്ഞു.

എവിടെ പോകുന്നു എന്നു ചോദിച്ചുകൊണ്ട് കൈയിലുണ്ടായിരുന്ന വാളെടുത്ത് ശ്രീനിതിന്റെ മുതുകിൽ വെട്ടുകയായിരുന്നു. വെട്ടേറ്റ് താഴെ വീണ ശ്രീനിതിനെ സഹപാഠികളാണ് അടുത്തുള്ള ആശുപത്രിയിൽ എത്തിച്ചത്. പൾസർ ബൈക്കിലെത്തിയ മൂന്നുപേരാണ് ശ്രീനിതിനെ വെട്ടിയതെന്ന് മറ്റു വിദ്യാർത്ഥികൾ പൊലീസിനോട് പറഞ്ഞു. ആക്രമിച്ചവരെ കുറിച്ച് സൂചന ലഭിച്ചതായി പോത്തൻകോട് സി.ഐ: ഷാജി പറഞ്ഞു.