ലാവലിന്‍ കേസില്‍ കെഎസ്ഇബി ജീവനക്കാരെ ബലിയാടാക്കിയെന്ന് ബിജെപി സംസ്ഥാന അധ്യക്ഷന്‍ കുമ്മനം രാജശേഖരന്‍. കരാര്‍ ജീവനക്കാര്‍ തയ്യാറാക്കിയതാണെങ്കിലും അതിന് പിന്നില്‍ രാഷ്ട്രീയ തീരുമാനം ഉണ്ട്. സാങ്കേതികമായി കുറ്റവിമുക്തനായെങ്കിലും പിണറായി വിജയന് ധാര്‍മികമായി ഒഴിഞ്ഞു മാറാന്‍ സാധിക്കില്ല. സിബിഐ അപ്പീല്‍ നല്‍കാന്‍ തയ്യാറാകണം. സുപ്രീംകോടതിയെ സമീപിക്കാന്‍ തയ്യാറാകണമെന്നും കുമ്മനം പറഞ്ഞു. അതേസമയം, ബാലാവകാശ കമ്മീഷന്‍ നിയമനവുമായി ബന്ധപ്പെട്ട് മന്ത്രി കെ.കെ ശൈലജ രാജി വെച്ച് പുറത്ത് പോകാന്‍ തയാറാകണമെന്നും കുമ്മനം പറഞ്ഞു.
ലാവലിന്‍ കേസില്‍ മുഖ്യമന്ത്രി പിണറായി വിജയനെ കുറ്റവിമുക്തനാക്കിക്കൊണ്ടുള്ളതാണ് ഹൈക്കോടതി ഉത്തരവ്. പിണറായി വിജയന്‍ അടക്കമുള്ള പ്രതികളെ കുറ്റവിമുക്തരാക്കിയ വിചാരണ കോടതി വിധി ഹൈക്കോടതി ശരിവെക്കുകയായിരുന്നു. പിണറായി വിജയനെതിരെ പ്രഥമദ്യഷ്ട്യാ കേസില്ലെന്ന് കോടതി വ്യക്തമാക്കി. പിണറായി വിജയന്‍ കേസില്‍ പ്രതിയല്ല. പിണറായി വിജയനെ സിബിഐ തെരഞ്ഞുപിടിച്ച് വേട്ടയാടിയെന്നും കോടതി വിമര്‍ശിച്ചു. പിണറായി വിജയന്‍ അടക്കം മൂന്നു പ്രതികളെ ഹൈക്കോടതി കുറ്റവിമുക്തനാക്കി. അതേസമയം മൂന്ന് കെഎസ്ഇബി ഉദ്യോഗസ്ഥര്‍ വിചാരണ നേരിടണമെന്നും കോടതി ഉത്തരവിട്ടു.