ഇന്ത്യന്‍ ഗതിനിര്‍ണ്ണയ സംവിധാനത്തിലെ ( നാവിക് ) ഏഴ് ഉപഗ്രഹ പരമ്പരയിലെ തകരാറിലായ ആദ്യ ഉപഗ്രഹത്തിന് പകരമുള്ള പുതിയ ഉപഗ്രഹം (ഐ.ആര്‍.എന്‍. എസ്.എസ്. 1 എച്ച് )ഇന്ന് വൈകിട്ട് 7 ന് ശ്രീഹരിക്കോട്ടയിലെ സതീഷ് ധവാന്‍ കേന്ദ്രത്തില്‍ നിന്ന് വിക്ഷേപിക്കും. പി. എസ്. എല്‍. വി. സി. 39 റോക്കറ്റിലാണ് വിക്ഷേപണം. 1425 കിലോഗ്രാം ഭാരമുള്ള ഉപഗ്രഹത്തില്‍ സ്ഥാനനിര്‍ണ്ണയം കൃത്യമാക്കാന്‍ അനിവാര്യമായ മൂന്ന് അറ്റോമിക് ഫ്രീക്വന്‍സി സ്റ്റാന്‍ഡേര്‍ഡ് ക്‌ളോക്കുകളാണുള്ളത്.

2013 ജൂലായ് ഒന്നിന് അയച്ച ആദ്യ ഗതിനിര്‍ണ്ണയ ഉപഗ്രഹത്തിലെ ക്‌ളോക്കുകളാണ് കേടായത്. ഇവ യൂറോപ്പില്‍ നിന്ന് വാങ്ങിയതായിരുന്നു. ഉപഗ്രഹത്തിന്റെയും റോക്കറ്റിന്റെയും സ്ഥിതി വിലയിരുത്തിയ മിഷന്‍ റെഡിനസ് റിവ്യൂ കമ്മിറ്റിയും ലോഞ്ച് ആതറൈസേഷന്‍കമ്മിറ്റിയും അനുമതി നല്‍കിയതോടെ ഇന്നലെ ഉച്ചയ്ക്ക് 2 മണിക്ക് 29 മണിക്കൂര്‍ ദൈര്‍ഘ്യമുള്ള കൗണ്ട് ഡൗണ്‍ ആരംഭിച്ചു. വിക്ഷേപണ മേല്‍നോട്ടത്തിന് ഐ. എസ്.ആര്‍.ഒ. ചെയര്‍മാന്‍ കിരണ്‍കുമാര്‍, വി. എസ്. എസ്.സി. ഡയറക്ടര്‍ ഡോ. ശിവന്‍ തുടങ്ങിയവര്‍ ശ്രീഹരിക്കോട്ടയില്‍ എത്തിയിട്ടുണ്ട്.