അനധികൃത പാര്‍ക്ക് നിര്‍മ്മാണത്തില്‍ പിവി അന്‍വര്‍ എംഎല്‍എക്ക് നോട്ടീസ് അയക്കാന്‍ കൂടരഞ്ഞി പഞ്ചായത്ത് ഭരണസമിതി തീരുമാനം. പതിനഞ്ച് ദിവസത്തിനകം എംഎല്‍എ വിശദീകരണം നല്‍കണം. മറുപടി തൃപ്തികരമല്ലെങ്കില്‍ പാര്‍ക്ക് പൂട്ടിക്കുമെന്ന് ഭരണസമിതി അറിയിച്ചു. പാര്‍ക്കിനുളള ശുചിത്വ സര്‍ട്ടിഫിക്കറ്റ് പിന്‍വലിച്ചതിനെ തുടര്‍ന്നാണ് നടപടി.
എന്നാല്‍ പാര്‍ക്കിന് അനുകൂലമായാണ് ജില്ലാ കളക്ടറുടെ റിപ്പോര്‍ട്ട്. റവന്യൂ മന്ത്രിക്ക് റിപ്പോര്‍ട്ട് സമര്‍പ്പിച്ചു. പാര്‍ക്കിരിക്കുന്ന സ്ഥലത്ത് ഭൂമി കയ്യേറ്റമില്ല.പാര്‍ക്ക് സ്ഥാപിച്ചിരിക്കുന്നത് ദുരന്ത സാധ്യതയുള്ള മേഖലയില്‍. ഇതേക്കുറിച്ച് കൂടുതല്‍ പരിശോധിക്കണമെന്നും റിപ്പോര്‍ട്ടില്‍ പറയുന്നു.
നേരത്തെ പിവി അന്‍വര്‍ നിയമലംഘനം നടത്തിയിട്ടില്ലെന്നായിരുന്നു പഞ്ചായത്ത് നിലപാടെടുത്തിരുന്നത്. എന്നാല്‍ കോണ്‍ഗ്രസ് നേതൃത്വത്തിലുളള സമിതി അന്‍വര്‍ എംഎല്‍എക്ക് അനുകൂലമായി തീരുമാനമെടുത്തിതിനെതിരെ കോഴിക്കോട് ഡിസിസി രംഗത്തെത്തിയിരുന്നു. ഇതിന്റെ അടിസ്ഥാനത്തിലാണ് നിയമലംഘനങ്ങള്‍ ഉണ്ടെന്ന് പഞ്ചായത്ത് മലക്കം മറിഞ്ഞത്.
അന്‍വറിന്റെ പാര്‍ക്കിന് ആരോഗ്യവകുപ്പ് മലിനീകരണ നിയന്ത്രണ ബോര്‍ഡ് തുടങ്ങിയവയില്‍ നിന്നുളള അനുമതികള്‍ റദ്ദാക്കിയിരുന്നു. ഈ സാഹചര്യത്തില്‍ നിയമലംഘനങ്ങള്‍ ഇനിയും മൂടിവെക്കാന്‍ സാധിക്കില്ലെന്ന് സമിതി നിലപാടെടുക്കുകയായിരുന്നു. ഇതിന്റെ ഭാഗമായാണ് നോട്ടീസ് അയക്കാനുളള തീരുമാനം.