വൈകിയ നീതി, നീതി നിഷേധമാണെങ്കിൽ അതിന്​ നീതിപീഠം ഹർജിക്കാരിയോട്​ ഖേദം പ്രകടിപ്പിച്ചു. മദ്രാസ്​ ഹൈക്കോടതിയിൽ നിന്നാണ്​ നീതിന്യായ ച​രിത്രത്തിൽ രേഖപ്പെടുത്തിവെ​ക്കേണ്ട സുപ്രധാന വിധി പ്രസ്​താവമുണ്ടായത്​. മകൻ്റെ മരണത്തിന്​ നഷ്​ടപരിഹാരം തേടി നീണ്ട 24 വർഷം നീതിക്കുവേണ്ടി അലഞ്ഞ സ്​ത്രീയോടാണ്​ ഒടുവിൽ കോടതിയുടെ ക്ഷമാപണം. ‘ക്ഷമിക്കണം, നിങ്ങളുടെ അവകാശം ഞങ്ങൾ ദീർഘകാലം തടഞ്ഞുവെച്ചതിന്​’ എന്ന വിധി വാചകത്തിലൂടെയാണ്​ നീതി പീഠം ആ അമ്മയുടെ നിലവിളി കേട്ടത്​. 1993 മെയ് 18നാണ് ലോറി ഡ്രൈവറായ മകൻ ലോകേശ്വരനെ ബക്കിയാമിന് നഷ്ടപ്പെട്ടത്. 

പൊതു​മേഖലാ ഇൻഷൂറൻസ്​ കമ്പനി സമർപ്പിച്ച അപ്പീൽ തള്ളികളഞ്ഞുകൊണ്ട്​ ജസ്​റ്റിസ്​ എൻ. സേശസായി ആണ്​ സുപ്രധാന വിധി പുറപ്പെടുവിച്ചത്​. മോ​ട്ടോർ വാഹന നഷ്​ട പരിഹാര ട്രൈബ്യൂണൽ വിധിച്ച 3.4 ലക്ഷം രൂപക്ക്​ എതിരെയായിരുന്നു ഇൻഷൂറൻസ്​ കമ്പനിയുടെ അപ്പീൽ. ‘ഈ അപകടം സംഭവിച്ചത്​ 1993ലാണ്​. ഈ അമ്മക്ക്​ 24 വർഷമായിട്ടും നഷ്​ടപരിഹാരം ലഭിച്ചിട്ടില്ല എന്നത്​ അൽപ്പം അതിരുകടന്നതായിപ്പോയി. അവർ ഇപ്പോഴും അതിന്​ നിവൃത്തി തേടി കാത്തിരിക്കുന്നു. ഈ അപ്പീൽ കാരണം അവർക്ക്​ എന്ത്​ പരിഹാരമാണോ ട്രൈബ്യൂണൽ വിധിച്ചത്​ അത്​ വൈകുകയാണുണ്ടായത്... ’ ജഡ്​ജി വ്യക്​തമാക്കി.
ഇൻഷൂറൻസ്​ കമ്പനിയുടെ വാദം ഒരു പൗര​ൻ്റെ ജീവനുള്ള വില അവഗണിക്കുന്നതാണെന്നും മകൻ അവ​ൻ്റെ രക്ഷിതാക്കൾക്ക്​ നൽകേണ്ട താങ്ങ്​ വിലമതിക്കാനാകാത്തതാണെന്നും ജസ്​റ്റിസ്​ എൻ. സേശസായി വ്യക്​തമാക്കി. സ്​റ്റേറ്റ്​ ട്രാൻസ്​പോർട്​ കോർപ്പറേഷ​ൻ്റെ ബസുമായി ലോറി കൂട്ടിയിടിച്ചുണ്ടായ അപകടത്തിലായിരുന്നു ഹരജിക്കാരിക്ക്​ മകൻ നഷ്​ടപ്പെട്ടത്​. മോ​ട്ടോർ വാഹന ട്രൈബ്യൂണലിൽ സമീപിക്കുന്നതിന്​ പകരം അമ്മ തൊഴിലാളി നഷ്​ടപരിഹാര ആക്​ട്​ പ്രകാരമാണ്​ നഷ്​ടപരിഹാരത്തിനായി സമീപിച്ചത്​. ഇ​ത്​ കോടതി തള്ളുകയായിരുന്നു.
അപ്പീൽ സമർപ്പിക്കുന്നതിന്​ പകരം അവർ മോ​ട്ടോർ വാഹന അപകട നഷ്​ട പരിഹാര ട്രൈബ്യൂണലിൽ അഞ്ച്​ ലക്ഷം ആവശ്യ​പ്പെട്ട്​ പുതിയ അപേക്ഷ നൽകി. ലോറിയുടെ ഇൻഷൂറൻസ്​ കമ്പനിയായ നാഷനൽ ഇൻഷൂറൻസ്​ കമ്പനി ഇതിനെ എതിർത്തു. തൊഴിലാളി നഷ്​ടപരിഹാര ആക്​ട്​ പ്രകാരം നൽകിയ അപേക്ഷയുണ്ടായിരിക്കെ ഇത്​ വഹിക്കാനാകില്ല എന്നായിരുന്നു ഇൻഷൂറൻസ്​ കമ്പനിയുടെ വാദം. എന്നാൽ വാദം തള്ളിയ ട്രൈബ്യൂണൽ 3.47 ലക്ഷം രൂപ നൽകാൻ വിധിച്ചു. ഇതെ തുടർന്നാണ്​ ഇൻഷൂറൻസ്​ കമ്പനി മദ്രാസ്​ ഹൈക്കോടതിയിൽ അപ്പീലുമായി എത്തിയത്​. ഇത്​ തള്ളിയാണ്​ കോടതി അമ്മയോട്​ ക്ഷമാപണം നടത്തിയത്​.