ഭാര്യയുടെ സ്വഭാവ ശുദ്ധിയെ സംശയിച്ച് ആരംഭിച്ച വഴക്ക് അവസാനിച്ചത് കൊലപാതകത്തില്‍.ദക്ഷിണ ഡല്‍ഹിയിലെ ബദര്‍പൂരില്‍ ശനിയാഴ്ച വൈകുന്നേരമാണ് സംഭവം. രണ്ട് മക്കളുടെ മുന്നില്‍ വച്ച് 30കാരിയായ യുവതിയെ കഴുത്തറുത്ത ശേഷം ഗ്യാസ് സിലിണ്ടറിന് അടിച്ചു കൊന്നു. ദമ്പതികളുടെ നാലും പത്തും വയസുള്ള കുട്ടികളുടെ മുന്നില്‍ വച്ചായിരുന്നു കൊലപാതകം.

മീനാക്ഷി എന്ന 30കാരിയാണ് കൊല്ലപ്പെട്ടത്. ഇവരുടെ ഭര്‍ത്താവ് പ്രവീണിനെ സംഭവസ്ഥലത്ത് നിന്ന് തന്നെ അറസ്റ്റ് ചെയ്തു. മീനാക്ഷിക്ക് മറ്റൊരു ബന്ധമുണ്ടെന്ന് സംശയിച്ചാണ് കൊലപാതകം നടത്തിയതെന്ന് ഡല്‍ഹി സൗത്ത് അഡീഷണല്‍ ഡിസിപി ചിന്‍മോയി ബിസ്‌വാള്‍ പറഞ്ഞു. പതിനൊന്ന് വര്‍ഷമായി ഇവരുടെ വിവാഹം കഴിഞ്ഞിട്ട്. ഭാര്യയുടെ സ്വഭാവ ശുദ്ധി സംശയിച്ച് ഇയാള്‍ പതിവായി വഴക്കുണ്ടാക്കിയിരുന്നു. പതിവ് വഴക്കില്‍ മനംമടുത്ത് മീനാക്ഷി രണ്ട് മക്കളുമായി സ്വന്തം വീട്ടിലേക്ക് മാറിയിരുന്നു.

എന്നാല്‍ മീനാക്ഷിയുടെ വീട്ടിലെത്തിയും പ്രവീണ്‍ വഴക്ക് തുടര്‍ന്നു. ശനിയാഴ്ചയും ഇരുവരും തമ്മില്‍ വഴക്കുണ്ടായി. ഇതേതുടര്‍ന്നാണ് കൊലപാതകം നടന്നത്. മീനാക്ഷിയുടെ മാതാപിതാക്കള്‍ പുറത്ത് പോയ സമയത്താണ് ഇയാള്‍ ഇവിടെയെത്തി കൊലപാതകം നടത്തിയത്.