രജനീകാന്ത് ബിജെപിയിലേക്കോ? ദൈവം ആഗ്രഹിക്കുകയാണെങ്കില്‍ താന്‍ തീര്‍ച്ചയായും രാഷ്ട്രീയത്തില്‍ ഉണ്ടാകും
ബിജെപി യുവജനവിഭാഗം അധ്യക്ഷ പൂനം മഹാജന്‍ രജനീകാന്തിനെ വസതിയിലെത്തി സന്ദര്‍ശിച്ചു. സൂപ്പര്‍സ്റ്റാര്‍ രജനീകാന്ത് സ്വന്തം പാര്‍ട്ടി രൂപീകരിക്കുമോ അതോ ബിജെപിയില്‍ ചേരുമോയെന്ന അഭ്യൂഹങ്ങള്‍ പ്രചരിക്കെവെയാണ് ഈ സന്ദര്‍ശനം. കൂടിക്കാഴ്ചയുടെ ചിത്രങ്ങള്‍ പൂനം മഹാജന്‍ ട്വിറ്ററില്‍ പങ്കുവച്ചു. സന്ദര്‍ശനത്തില്‍ രാഷ്ട്രീയ ലക്ഷ്യങ്ങളൊന്നുമില്ലെന്ന് പൂനം പിന്നീടു പ്രതികരിച്ചു.
മുംബൈയില്‍ നിന്നുള്ള ബിജെപി എംപി കൂടിയാണു പൂനം മഹാജന്‍. രജനീകാന്തിന്റെ ഭാര്യ ലതയും വീട്ടില്‍ ഉണ്ടായിരുന്നു. ഇവര്‍ക്കൊപ്പമുള്ള ചിത്രവും പൂനം പങ്കുവച്ചിട്ടുണ്ട്. കൂടിക്കാഴ്ചയ്ക്ക് രാഷ്ട്രീയ പ്രാധാന്യമുണ്ടെന്നാണു നിരീക്ഷകരുടെ നിഗമനം. രജനീകാന്തിനെ കാണാനായതില്‍ ഏറെ സന്തോഷമുണ്ടെന്നും. അദ്ദേഹം തന്നെ വ്യക്തിപരമായി പിന്തുണയ്ക്കുന്ന ആളാണെന്നും പൂനം പറഞ്ഞു. ബിജെപി യുവജന വിഭാഗത്തിന്റെ റാലിയില്‍ പങ്കെടുക്കാന്‍ തമിഴ്‌നാട്ടില്‍ എത്തിയതായിരുന്നു പൂനം.
രാഷ്ട്രീയ പ്രവേശനവുമായി ബന്ധപ്പെട്ട ചോദ്യങ്ങള്‍ക്കു ദൈവം ആഗ്രഹിക്കുകയാണെങ്കില്‍ താന്‍ തീര്‍ച്ചയായും രാഷ്ട്രീയത്തില്‍ ഉണ്ടാകും എന്നാണു രജനീകാന്ത് നേരത്തേ പറഞ്ഞത്. രജനീകാന്ത് ഈ വര്‍ഷം സ്വന്തമായി രാഷ്ട്രീയ പാര്‍ട്ടി പ്രഖ്യാപിക്കുമെന്നു സഹോദരന്‍ സത്യനാരായണ റാവു ഗെയ്ക്കവാദ് വെളിപ്പെടുത്തിയിരുന്നു. പാര്‍ട്ടിയുടെ പേരും ചിഹ്നവും ഉള്‍പ്പെടെയുള്ള കാര്യങ്ങള്‍ തീരുമാനിക്കുന്നതിനായി ചര്‍ച്ചകള്‍ നടക്കുകയാണ്. പദ്ധതികള്‍ക്ക് അന്തിമരൂപം നല്‍കുന്നതിനു മുന്‍പു പരമാവധി ആരാധകരെ നേരില്‍ക്കാണാനാണു താരം ശ്രമിക്കുന്നതെന്നും സഹോദരന്‍ റാവു ഗെയ്ക്കവാദ് പറഞ്ഞു.
https://www.facebook.com/Malayalivartha
