മാധ്യമ ​പ്ര​വ​ർ​ത്ത​ക ഗൗ​രി ലങ്കേഷിന്റെ കൊ​ല​യാ​ളി​യെന്ന് സം​ശ​യി​ക്കു​ന്നയാളുടെ വ്യക്തതയുള്ള ചിത്രം പൊലീസ് പുറത്തുവിട്ടു. കൊ​ല​യാ​ളി​ക​ളെ​ന്ന് സം​ശ​യി​ക്കു​ന്ന​വ​രു​ടെ രേ​ഖാ​ചി​ത്ര​ങ്ങ​ൾ പ്ര​ത്യേ​ക അ​ന്വേ​ഷ​ണ സം​ഘം (എ​സ്.​ഐ.​ടി) കഴിഞ്ഞദിവസം പു​റ​ത്തു​വി​ട്ടിരുന്നു എന്നാൽ കൂടുതൽ വ്യക്തമായ ചിതമാണ് ഇപ്പോൾ പുറത്തു വിട്ടിരിക്കുന്നത്.വെള്ള ഷർട്ടും കറുത്ത പാന്‍റും ധരിച്ചയാൾ ബജാജ് പൾസർ ബൈക്കിൽ പോകുന്ന ദൃശ്യമാണ് പുറത്തുവിട്ടത്. ഇയാൾ ഹെൽമറ്റ് ധരിച്ചതിനാൾ മുഖം വ്യക്തമല്ല. യു.എസിലെ ലാബിൽ നടത്തിയ പരിശോധനയിലാണ് സി.സി.ടിവി ദൃശ്യം ലഭിച്ചത്.

നേരത്തെ പുറത്തു വിട്ട ചിത്രങ്ങൾ സി.​സി.​ടി.​വി ദൃ​ശ്യ​ങ്ങ​ളു​ടെ​യും ദൃ​ക്സാ​ക്ഷി​ക​ളു​ടെ മൊ​ഴി​ക​ളു​ടെ​യും അ​ടി​സ്ഥാ​ന​ത്തി​ൽ തയാറാക്കിയതായിരുന്നു.സെ​പ്​​റ്റം​ബ​ർ​ അഞ്ചിന് വൈകിട്ടാണ് ഗൗരി ലങ്കേഷ് ബാംഗ്ലൂരിലെ വീട്ടിൽ ആ​ക്ര​മി​ക​ളു​ടെ വെ​ടി​യേ​റ്റ്​ കൊ​ല്ല​പ്പെ​ടു​ന്ന​ത്. കൊലപാതകത്തിനെതിരെ രാജ്യത്തിൻറെ പലഭാഗത്തും നിന്നും പ്രതിഷേധം ഉയർന്നു വന്നിരുന്നു.