ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ താജ് മഹൽ സന്ദര്ശനത്തിനെ പരിഹസിച്ച് സമാജ് വാദി പാർട്ടി നേതാവ് അഖിലേഷ് യാദവ്. താജ് മഹൽ ഇന്ത്യൻ സംസ്കാരത്തിന്‍റെ ഭാഗമല്ലെന്നും അതിനെ അംഗീകരിക്കാനാവില്ലെന്നും പറഞ്ഞവർ താജിന്‍റെ പരിസരം വൃത്തിയാക്കാൻ നിർബന്ധിതരായെന്ന് അഖിലേഷ് പരിഹസിച്ചു.

ഇന്ന് രാവിലെയാണ് പൊതു ശുചീകരണം പ്രോത്സാഹിപ്പിക്കാൻ ​ താജ്മഹലിന്റെ പടിഞ്ഞാറെ ഗേറ്റിനു സമീപം പാർക്കിങ്ങ്​ ഏരിയയിൽ ബി.ജെ.പി പ്രവര്‍ത്തകര്‍ക്കൊപ്പം യോഗി ശുചീകരണം നടത്തിയത്. താജ്മഹലിനെക്കുറിച്ചുള്ള ബി.ജെ.പി എം.എൽ.എ സംഗീത് സോമിന്റെയും എം.പി വിനയ് കത്യാറിന്റെയും വിവാദ പരമാർശങ്ങൾ ചർച്ചയാകുന്നതിനിടെയാണ് യോഗി ആദിത്യനാഥിന്റെ സന്ദർശനം. ഉത്തര്‍പ്രദേശ് സര്‍ക്കാരിന്‍റെ ടൂറിസം കൈപ്പുസ്തകത്തില്‍ നിന്ന് താജ്മഹലിനെ ഒഴിവാക്കിയതിനു പിന്നാലെയാണ് ബി.ജെ.പി നേതാക്കൾ വിവാദ പ്രസ്താവനകളുമായി രംഗത്തെത്തിയത്.

താജ് നഗരത്തിൽ ടൂറിസം പ്രോത്സാഹിപ്പിക്കുന്നതിന് വികസന പദ്ധതികൾക്കായി 370 കോടി രൂപ സർക്കാർ ചെലവഴിക്കുമെന്ന് യോഗി നേരത്തെ പ്രഖ്യാപിച്ചിരുന്നു. മുഖ്യമന്ത്രിയായിരുന്ന കാലത്ത് അഖിലേഷ് ഭാര്യ ഡിംപിൾ യാദവിനൊപ്പം താജ്മഹൽ സന്ദർശിച്ചിരുന്നു.