ഉത്തർപ്രദേശ് മുഖ്യമന്ത്രി യോഗി ആദിത്യനാഥിന്റെ താജ്മഹൽ സന്ദർശനത്തിന് ഒരുങ്ങുമ്പോൾ ഒരു ഗ്രാമത്തിലെ മുഴുവൻ ജനങ്ങളെയും വീടിനുള്ളിൽ പൂട്ടിയിട്ടു. സുരക്ഷയൊരുക്കുന്നതിന്റെ ഭാഗമായാണ് ഈ പൂട്ടിയിടൽ. താജ്മഹലിന് സമീപമുള്ള കാച്പുര ഗ്രാമത്തിലാണ് ജനങ്ങളെ പൂട്ടിയിട്ടിരിക്കുന്നത്.

ജില്ലാ ഭരണകൂടമാണ് സുരക്ഷയുടെ ഭാഗമായി ഗ്രാമവാസികളെ മുഴുവൻ വീടിനുള്ളിൽ പൂട്ടിയിട്ടത്. കുട്ടികളെയും പ്രായമായവരെ പോലും വീടിനകത്ത് പൂട്ടിയിട്ടുവെന്നാണ് പരാതി. പ്രാഥമിക കർമത്തിന് പോലും ഇവിടെ സുരക്ഷയൊരുക്കിയ പൊലീസ് ഉദ്യോഗസ്ഥർ അനുവദിച്ചില്ലെന്ന് ഗ്രാമവാസികൾ പറയുന്നു.

മുഖ്യമന്ത്രിയെ കാണാൻ ആഗ്രഹിച്ചിരുന്നതായിരുന്നു ഞങ്ങൾ. എന്നാൽ രാവിലെ വീട്ടിലെത്തിയ പൊലീസ് ഉദ്യോഗസ്ഥർ തികച്ചും അപ്രതീക്ഷിതമായ നടപടി സ്വീകരിക്കുകയായിരുന്നു. എല്ലാം വീടുകളും പുറത്ത് നിന്ന് പൂട്ടി.

എന്ത് തരത്തിലുള്ള സുരക്ഷസംവിധാനമാണിതെന്ന് മനസിലാവുന്നില്ലെന്നും ഗ്രാമവാസികൾ ദേശീയ മാദ്ധ്യമങ്ങളോട് പറഞ്ഞു. എന്നാൽ ഇടുങ്ങിയ സ്ഥലമായ ഗ്രാമത്തിൽ മുഖ്യമന്ത്രി സന്ദർശിക്കുകയാണെങ്കിൽ സുരക്ഷ ഒരുക്കുക ബുദ്ധിമുട്ടായിരിക്കുമെന്നും ഇതിനാലാണ് വീടുകൾ അടച്ചിട്ടതെന്നുമാണ് ജില്ലാ ഭരണകൂടം പറയുന്നത്.