ബ്ലൂവെയൽ ഗെയിം ദേശീയ പ്രശ്നമെന്ന് സുപ്രീം കോടതി. ഗെയിമിന്‍റെ അപകടങ്ങളെ കുറിച്ച് ബോധവത്ക്കരണം നടത്തണമെന്നും കോടതി നിർദേശിച്ചു. ദൂരദർശനും സ്വകാര്യ ചാനലുകളും ബോധവത്കരണ പരപാടികൾ സംപ്രേഷണം ചെയ്യണമെന്നും കോടതി ഉത്തരവിട്ടു.

ബ്ലൂവെയൽ നിരോധിക്കണമെന്ന് ആവശ്യപ്പെട്ട് തമിഴ്നാട് സ്വദേശിയായ അഭിഭാഷകൻ എൻ.എസ്. പൊന്നയ്യ സമർപ്പിച്ച ഹർജിയിലാണ് സുപ്രീം കോടതിയുടെ നിർദേശം. രാജ്യത്ത് ബ്ലൂവെയൽമൂലം 100 പേർ ആത്മഹത്യ ചെയ്തുവെന്നും പൊന്നയ്യ ഹർജിയിൽ ആരോപിച്ചിരുന്നു.

ഗെയിമിന്‍റെ അപകടങ്ങളെ കുറിച്ച് പഠിക്കാൻ വിദഗ്ധ സമിതിയെ നിയോഗിച്ചതായി കേന്ദ്രസർക്കാർ സുപ്രീംകോടതിയെ അറിയിച്ചു. വിദഗ്ധ സമിതിയുടെ റിപ്പോർട്ട് മൂന്നാഴ്ചക്കകം സമർപ്പിക്കുമെന്നും സർക്കാർ കോടതിയിൽ വ്യക്തമാക്കി.