മറ്റ് കമ്പനികളൊക്കെ ഉയര്‍ത്തിയ വെല്ലുവിളികളെ അതിജീവിച്ച് വിപണിയില്‍ പിടിച്ചുനില്‍ക്കാനൊരുങ്ങുകയാണ് പൊതുമേഖലാ ടെലികോം കമ്പനിയായ ബിഎസ്എൻഎൽ. നവംബർ ഒന്നുമുതൽ ബിഎസ്എൻഎൽ നെറ്റ് വേഗത കൂടും.

നിലവിൽ ബിഎസ്എൻഎൽ ഇന്റർനെറ്റ് പ്ലാൻ പ്രകാരം രണ്ട് എം.ബി.പി.എസ് വേഗതയാണുള്ളത്. ഇതിൽനിന്നും വേഗത എട്ട് എം.ബി.പി.എസ് ആയി മാറും. വേഗത കൂടുന്നുണ്ടെങ്കിലും നിരക്കുകൾക്ക് വ്യത്യാസമൊന്നുണ്ടാകില്ല. പുതിയ വേഗത്തിലേക്കു ബ്രോഡ്ബാൻഡ് കണക്ഷനുകൾ ഉയർത്താൻ എല്ലാ സര്‍ക്കിളുകള്‍ക്കും നിര്‍ദ്ദേശം നല്‍കി കഴിഞ്ഞു.

പുതിയ തീരുമാനങ്ങളിലൂടെ ഉപഭോക്താക്കളുടെ എണ്ണം കുറയുന്നത് തടയുന്നതിനൊപ്പം കൂടുതല്‍ പേരെ ആകര്‍ഷിക്കാനും കഴിയുമെന്നാണ് കമ്പനിയുടെ നിഗമനം. 249 രൂപയുടെ അൺലിമിറ്റഡ് ബ്രോഡ്ബാൻഡ് പ്ലാനിൽ രണ്ട് എം.ബിയാണ് ഇപ്പോഴത്തെ വേഗം. ഇത് എട്ട് എം.ബിയായി മാറും. മാസത്തില്‍ അഞ്ച് ജി.ബിയുടെ ഫെയര്‍ യൂസേജ് പരിധി അങ്ങനെ തന്നെ നിലനില്‍ക്കും. അഞ്ച് ജി.ബിക്ക് ശേഷം ഒരു എം.ബി.പി.എസ് ആയിരിക്കും വേഗത.

499, 545, 650 രൂപയുടെ പ്ലാനുകളിലെല്ലാം ഇപ്പോള്‍ രണ്ട് എം.ബി.പി.എസ് ആണ് വേഗത. ഇതെല്ലാം എട്ട് ആയി ഉയരും. എന്നാല്‍ എല്ലാ പ്ലാനുകളിലും ഫെയര്‍ യൂസേജ് പരിധി കഴിഞ്ഞാൽ ഒരു എം.ബി.പി.എസ് ആയി വേഗത കുറയും. ഫെയര്‍ യൂസേജില്‍ വര്‍ദ്ധനവ് വരില്ല. നിലവില്‍ എട്ട് എം.ബി.പി.എസ് വേഗത ലഭിച്ചിരുന്ന പ്ലാനുകള്‍ 10 എം.ബി.പി.എസിലേക്ക് ഉയര്‍ത്തും. ഫെയര്‍ യൂസേജ് പരിധി കഴിഞ്ഞാൽ ഇവയുടെ വേഗം രണ്ട് ജി.ബി.പി.എസ്.ആയി മാറും. നിലവില്‍ നാല് എം.ബി.പി.എസ് സ്പീഡ് ലഭിക്കുന്ന പ്ലാനുകളും പത്ത് എം.ബി.പി.എസ് വേഗതയിലേക്ക് മാറും.