ഡല്ഹിയിലെ കോളനി ഒഴിപ്പിക്കുന്നതിനെതിരേയുള്ള സമരത്തിനിടെയുണ്ടായ പോലീസ് ലാത്തിച്ചാര്ജില് ആനി രാജയ്ക്ക് പരിക്ക്
ഡല്ഹിയിലെ കോളനി ഒഴിപ്പിക്കുന്നതിനെതിരേയുള്ള സമരത്തിനിടെ സിപിഐ നേതാവ് ആനി രാജ അടക്കമുള്ളവര്ക്ക് മര്ദ്ദനം. പടിഞ്ഞാറന് ഡല്ഹിയിലെ കട്പുത്തലി കോളനിയിലാണ് സംഭവം. ചേരി ഒഴിപ്പിക്കുന്നതുമായി ബന്ധപ്പെട്ടുണ്ടായ സംഘര്ഷത്തില് പോലീസ് ലാത്തിച്ചാര്ജ് നടത്തുന്നതിനിടെ ഗുണ്ടാ സംഘം ആക്രമിക്കുകയായിരുന്നെന്ന് നേതാക്കള് ആരോപിച്ചു. തലയ്ക്കും കൈയ്ക്കും പരിക്കേറ്റ ആനി രാജയെ ഡല്ഹിയിലെ ആര്എംഎല് ആശുപത്രിയില് പ്രവേശിപ്പിച്ചു. പടിഞ്ഞാറന് ഡല്ഹിയിലെ കട്പുത്തലി കോളനി ഒഴിപ്പിക്കാനുള്ള ഡല്ഹി ഡവലപ്മെന്റ് അഥോറിറ്റിയുടെ നീക്കത്തിനെതിരേ സിപിഐയുടെ നേതൃത്വത്തില് കടുത്ത പ്രതിഷേധമുയര്ത്തിയിരുന്നു.
കോളനി ഒഴിപ്പിക്കാന് ഡിഡിഎ അധികൃതര് എത്തിയത് അറിഞ്ഞുകൊണ്ട് പ്രതിഷേധമുയര്ത്തിയ ആനി രാജ അടക്കമുള്ള നേതാക്കള്ക്കും നാട്ടുകാര്ക്കുമെതിരേ പോലീസ് ലാത്തിച്ചാര്ജ് നടത്തുകയായിരുന്നു. പോലീസുകാര്ക്കൊപ്പം ഒരു വിഭാഗം ഗുണ്ടകള് തങ്ങളെ വളഞ്ഞുവെച്ച് മര്ദ്ദിച്ചെന്നും ആനി രാജ അടക്കമുള്ള നേതാക്കള് ആരോപിച്ചു.
രാജ്യത്തിന്റെ വിവിധ ഭാഗങ്ങളിലുള്ള 3500ല് അധികം കലാകാരന്മാര് താമസിക്കുന്ന സ്ഥലമാണ് കട്പുത്തലി കോളനി. ഷെഡുകളുള്ള ഈ സ്ഥലം ഒഴിപ്പിച്ച് വീടുകള് കെട്ടിക്കൊടുക്കാമെന്നാണ് ഡിഡിഎ പറയുന്നത്. എന്നാല്, വീട് തങ്ങള്ക്ക് ഉറപ്പാക്കാതെ സ്ഥലമൊഴിയില്ലെന്നു വ്യക്തമാക്കിയാണ് നാട്ടുകാര് പ്രതിഷേധമുയര്ത്തുന്നത്.
https://www.facebook.com/Malayalivartha
