ട്രാന്‍സ്‌ഫോര്‍മര്‍ പൊട്ടിത്തെറിച്ച് രാജസ്ഥാനിലെ ജയ്പ്പൂരില്‍ 9 പേര്‍ കൊല്ലപ്പെട്ടു. 22 പേര്‍ക്ക് പരിക്കേറ്റു. ജയ്പ്പൂരിനടുത്ത് ഖട്ടുലായ് ഗ്രാമത്തില്‍ ചൊവ്വാഴ്ച ഉച്ചയ്ക്ക് ശേഷമാണ് അപകടമുണ്ടായത്. പരിക്കേറ്റ പലരുടെയും നില ഗുരുതരമായതിനാല്‍ മരണസംഖ്യ ഇനിയും വര്‍ദ്ധിക്കുമെന്നാണ് സൂചന

ഒരു വിവാഹ ചടങ്ങുമായി ബന്ധപ്പെട്ട് ട്രാന്‍ഫോര്‍മറിന് അടുത്തു കൂടി പോകുകയായിരുന്നവരാണ് അപകടത്തില്‍പ്പെട്ടത്. ട്രാന്‍ഫോര്‍മര്‍ പൊട്ടിത്തെറിച്ചയുടന്‍ സമീപമുണ്ടായിരുന്നവരിലേക്ക് തീ പടരുകയായിരുന്നുവെന്ന് ദൃക്‌സാക്ഷികള്‍ പറയുന്നു. അഞ്ചുപേര്‍ സംഭവ സ്ഥലത്തുതന്നെ മരിച്ചു. ഇവരില്‍ ഒരു കുട്ടിയും ഉള്‍പ്പെടുന്നു. മരിച്ചവരെല്ലാം സ്ത്രീകളും കുട്ടികളുമാണ്.

ദുരന്തത്തില്‍ സര്‍ക്കാര്‍ ഉന്നതതല അന്വേഷണം പ്രഖ്യാപിച്ചു. മരിച്ചവരുടെ കുടുംബങ്ങള്‍ക്കു നഷ്ടപരിഹാരമായി 10 ലക്ഷം രുപ വീതം നല്‍കുമെന്നു സര്‍ക്കാര്‍ അറിയിച്ചു.