രണ്ട് വയസ്സുകാരിയായ മകളെ രക്ഷിക്കാന്‍ അമ്മ പുള്ളിപ്പുലിയുമായി ജീവന്‍ പണയം വെച്ച് ഏറ്റുമുട്ടി. മധ്യപ്രദേശിലെ മൊറേനയിലാണ് 25-കാരിയായ അമ്മ പുള്ളിപ്പുലിയുമായി ഏറ്റുമുട്ടിയത്.അവര്‍ താമസിക്കുന്ന ഭായ്‌സായ് ഗ്രാമത്തില്‍ നിന്നുള്ള യാത്രയ്ക്കിടെയാണ് പുള്ളിപ്പുലിയുടെ ആക്രമണമുണ്ടായത്.

മണ്‍കൂനയ്ക്കു മറവില്‍ നിന്നു പുള്ളിപ്പുലി ചാടി വീണ് ആക്രമിക്കുകയായിരുന്നു. ആക്രമണത്തോടെ ആഷയുടെ കയ്യില്‍ നിന്ന് മകള്‍ തെറിച്ചു പോയി. മകളെ കടിച്ചെടുത്ത് പുള്ളിപ്പുലി ഓടാന്‍ ശ്രമിക്കുന്നതിനിടയില്‍ ആഷ പുള്ളിപ്പുലിയുമായി വെറുംകയ്യോടെ ഏറ്റുമുട്ടുകയായിരുന്നു. ആഷയുടെ കൈയില്‍ പുലി കടിച്ച് ആഴത്തില്‍ മുറിവേറ്റെങ്കിലും പോരാട്ടം തുടരുകയായിരുന്നു.

വീണ്ടും കടിക്കാന്‍ ശ്രമിച്ചെങ്കിലും ഈ ശ്രമത്തിനിടെയില്‍ സാരി കീറിയതോടെ ആഷയ്ക്ക് പുള്ളിപ്പുലിയില്‍ നിന്ന് അകലാനുള്ള സാവകാശം കിട്ടി. പേടിച്ചു മാറിയാല്‍ തന്നെയും മകളെയും പുലി കൊല്ലുമെന്ന് ആഷയ്ക്കുറപ്പായിരുന്നു. വീണ്ടും പല തവണ പുള്ളിപ്പുലി ഇവര്‍ക്കു നേരെ ചാടാന്‍ ശ്രമിച്ചെങ്കിലും കുട്ടിയെ എടുത്ത് ആഷ ഒഴിഞ്ഞ് മാറി. വീണ്ടും പുലി അടുത്തെത്തിയപ്പോള്‍ ആഷ പുള്ളിപ്പുലിയുടെ കഴുത്തില്‍ തന്നെ പിടികൂടി. ഇതോടെ നഖം കൊണ്ട് ആഷയുടെ കയ്യിലും തോളിലും മുറിവേല്‍പ്പിക്കാന്‍ പുലിയ്ക്ക് കഴിഞ്ഞെങ്കിലും ജീവന്‍ അപായപ്പെടുത്തുന്ന രീതിയില്‍ കടിക്കാന്‍ സാധിച്ചില്ല. ഏകദേശം 20 മിനിട്ടോളം ഈ പോരാട്ടം തുടര്‍ന്നു.

പുള്ളിപ്പുലിയുടെ അലര്‍ച്ചയും ആഷയുടെ കരച്ചിലും കേട്ട് നാട്ടുകാര്‍ ഓടിയെത്തി. ഇതോടെ പുള്ളിപ്പുലി ഓടി മറയുകയായിരുന്നു. ആക്രമണത്തില്‍ പരിക്കേറ്റ ആഷയും മകളും ഇപ്പോള്‍ മൊറേന ജില്ലാ ആശുപത്രിയില്‍ ചികിത്സയിലാണ്. അതേസമയം പ്രദേശത്തു നിന്ന് കാല്‍പാടുകള്‍ കണ്ടെത്താന്‍ കഴിയാത്തതിനാല്‍ ഇത് പുള്ളിപ്പുലിയുടെ ആക്രമണമാണെന്ന് ഔദ്യോഗികമായി സ്ഥിരീകരിക്കാന്‍ വനം വകുപ്പ് തയ്യാറായിട്ടില്ല