പ്രായപൂര്‍ത്തിയാകാത്ത കുട്ടികളോട് അതിക്രൂരമായ വിധത്തില്‍ പ്രകൃതിവിരുദ്ധ പീഡനം നടത്തി നവ മാധ്യമങ്ങളിലൂടെ പ്രചരിപ്പിച്ച സംഭവത്തില്‍ പത്തുപേര്‍ പിടിയില്‍. ഡല്‍ഹി രോഹിണിയില്‍ ഒക്‌ടോബര്‍ 26നാണ് മനസാക്ഷിയെ ഞെട്ടിച്ച പീഡനം നടന്നത്. നവമാധ്യമങ്ങളിലൂടെ പ്രചരിച്ച ദൃശ്യങ്ങള്‍ കണ്ട് മാതാപിതാക്കള്‍ ശനിയാഴ്ച പരാതിപ്പെട്ടതോടെയാണ് ഇവരെ പോലീസ് പിടികൂടുന്നത്.

കുട്ടികളുടെ സ്വകാര്യ ഭാഗങ്ങളില്‍ സിഗരറ്റ് കൊണ്ട് പൊള്ളിക്കുകയും മുളക്‌പൊടി വിതറുകയും പെട്രോളൊഴിച്ചുമാണ് ഉപദ്രവിച്ചത്. പ്രതികള്‍ക്കെതിരെ പ്രകൃതി വിരുദ്ധ പീഡനത്തിനും പോക്‌സോ നിയമപ്രകാരവും കേസെടുത്തതായി പോലീസ് അറിയിച്ചു.

മെട്രോ നഗറില്‍ താമസിക്കുന്ന 13ഉം 15ഉം വയസ്സുള്ള സുഹൃത്തുക്കളെയാണ് പത്തംഗസംഘം അതിക്രൂരമായ പീഡനത്തിന് വിധേയമാക്കിയത്. പ്രതികളില്‍ ഒരാളായ കന്‍വാര്‍ സിംഗിന്റെ വീട്ടില്‍ നടന്ന മോഷണത്തില്‍ കുട്ടികള്‍ക്ക് പങ്കുണ്ടെന്ന സംശയത്തെ തുടര്‍ന്നാണ് പ്രാകൃതമായ ഈ ക്രൂരത അരങ്ങേറിയത്. സിംഗിന്റെ വീട്ടിലേക്ക് വിളിച്ചുവരുത്തിയ ശേഷമായിരുന്നു പീഡനം.

കുട്ടികള്‍ മോഷണക്കുറ്റം സമ്മതിക്കാതെ വന്നതോടെ ബെല്‍റ്റ് കൊണ്ട് അവരെ അടിച്ചു. തുടര്‍ന്ന് സിംഗ് കൂട്ടുകാരെ വിളിച്ചുവരുത്തി ശാരീരികമായി ചൂഷണം ചെയ്യുകയായിരുന്നു. ഈ രംഗങ്ങള്‍ വീഡിയോവില്‍ പകര്‍ത്തി നവമാധ്യമങ്ങളിലൂടെ പ്രചരിപ്പിച്ചു. പീഡനക്കാര്യം പോലീസ് സ്ഥിരീകരിച്ചിട്ടുണ്ട്.

മൃഗീയമായ ഈ പീഡനത്തെ തുടര്‍ന്ന് ഗുരുതരാവസ്ഥയില്‍ ആയ കുട്ടികള്‍ രോഹിണിയിലെ അംബേദ്കര്‍ ആശുപത്രിയില്‍ ചികിത്സയിലാണ്. പ്രതികളില്‍ രണ്ടു പേരെ ശനിയാഴ്ചയും മറ്റുള്ളവരെ ഞായറാഴ്ചയുമാണ് പിടികുടിയതെന്ന് ഡല്‍ഹി പോലീസ് സ്‌പെഷ്യല്‍ കമ്മീഷണര്‍ ദീപേന്ദ്ര പതക് അറിയിച്ചു.