വെറും നിസാരം എന്നു നമ്മൾ കരുതുന്ന പലതിനും മാത്രമല്ല ജീവനുകൾക്കും ഏറെ പ്രാധാന്യമുണ്ടെന്ന് കാട്ടിത്തരികയാണ് ദുബായ് കിരീടാവകാശി ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തൂം. ഒരു ചെറിയ കാര്യം മുൻനിർത്തി അതിൽ നിന്ന് എത്രയോ മടങ്ങ് വലുതായ വീക്ഷണം നമുക്ക് മുന്നിൽ കാട്ടിത്തരുകയാണ്. ഒരു ചെറു കിളിക്ക് കൂടു കൂട്ടാനായി കോടികൾ വിലയുള്ള തന്റെ ബെൻസ് വിട്ടു നൽകിയിരിക്കുകയാണ് ഷെയ്ഖ് ഹംദാൻ.

ഷെയ്ഖ് ഹംദാൻ തന്നെയാണ് ഇസ്റ്റഗ്രാം സ്റ്റോറിയിലൂടെ ഇതു ഷെയർ ചെയ്തിരിക്കുന്നത്. ഇത്തരത്തിൽ ഷെയർ ചെയ്ത വിഡിയോയിലാണ് മെഴിസിഡീസ് ബെൻസ് ജി63 എഎംജിയിൽ കൂടു കൂട്ടിയിരിക്കുന്ന കുഞ്ഞിക്കിളിയുടെ കാര്യം പുറം ലോകം അറിഞ്ഞത് തന്നെ. കൂടുകൂട്ടുക മാത്രമല്ല മുട്ടയിട്ട് അടയിരിക്കുകയാണ് കിളി എന്നതും ശ്രദ്ധേയമാണ്. എന്നാൽ കൂടുകൂട്ടിയത് കണ്ട് മറ്റുള്ളവരോടെ വാഹനത്തിന് അടുത്തേക്ക് പോകരുതെന്നും ഷെയ്ഖ് നിർദേശം നൽകിയിട്ടുണ്ടത്രേ.

അതുപോലെ തന്നെ ശ്രദ്ധേയമാണ് ആ വാഹനം. ഷെയ്ഖ് ഹംദാൻ ബിൻ മുഹമ്മദ് ബിൻ റാഷിദ് അൽ മക്തുമിന്റെ ഏറ്റവും പ്രിയപ്പെട്ട വാഹനങ്ങളിലൊന്നാണ് ജി63 എഎംജി എന്നത് ഏവർക്കും അറിയാവുന്നതാണ്. 5.5 ലീറ്റർ വി– ട്വിൻ പെട്രോൾ എൻജിൻ ഉപയോഗിക്കുന്ന വാഹനത്തിന് 572 ബിഎച്ച്പി കരുത്തും 760 എൻഎം ടോർക്കുമുണ്ട്. പൂജ്യത്തിൽ നിന്ന് 100 കിലോമീറ്റർ വേഗം കൈവരിക്കാൻ 5.4 സെക്കന്റുകൾ മാത്രം മതി വാഹനത്തിന്. അത്രമേൽ വിലപിടിപ്പുള്ളതും പ്രിയപെട്ടതുമായ വാഹനമാണ് ഒരു കുഞ്ഞുകിളിക്കായി നൽകിയിരിക്കുന്നത്.