പൊന്നിന്‍ പകിട്ടണിഞ്ഞ് ഇന്ത്യ. രണ്ടാം ദിനം രണ്ട് സ്വര്‍ണവുമായി ഹ്വാംഗ്‌ചോ ഏഷ്യന്‍ ഗെയിംസില്‍ ഇന്ത്യ. പുരുഷന്മാരുടെ ഷൂട്ടിംഗ് 10 മീറ്റര്‍ എയര്‍ റൈഫിള്‍ ടീം ഇനത്തില്‍ ലോക റെക്കാഡോടെ ഐശ്വരി പ്രതാപ് സിംഗ് തോമര്‍, രുദ്രാക്ഷ് പാട്ടീല്‍, ദിവ്യാംശ് സിംഗ് പന്‍വാര്‍ എന്നിവര്‍ ഈ ഗെയിംസില്‍ രാജ്യത്തിന്റെ ആദ്യ സ്വര്‍ണം സ്വന്തമാക്കി.


ആദ്യമായി ഗെയിംസിനെത്തിയ വനിതാ ക്രിക്കറ്റ് ടീം രണ്ടാമത്തെ സ്വര്‍ണവും കഴുത്തിലണിഞ്ഞു. പ്ലേയിംഗ് ഇലവനില്‍ സ്ഥാനം ലഭിച്ചില്ലെങ്കിലും മലയാളിതാരം മിന്നു മണിക്കും മെഡല്‍പ്പട്ടികയില്‍ ഇടം.

ഫൈനലില്‍ ശ്രീലങ്കയെ 19 റണ്‍സിന് തോല്‍പ്പിച്ചാണ് ഇന്ത്യ പൊന്നണിഞ്ഞത്.ഷൂട്ടിംഗില്‍ ഇന്നലെ രണ്ട് വെങ്കലവും ഇന്ത്യക്ക് സ്വന്തം. വ്യക്തിഗത ഇനത്തില്‍ ഐശ്വരി പ്രതാപ് സിംഗ്, 25 മീറ്റര്‍ റാപ്പിഡ് ഫയര്‍ പിസ്റ്റള്‍ ടീമിനത്തില്‍ ആദര്‍ശ് സിംഗ്, അനിഷ്, വിജയവീര്‍ സിദ്ധു എന്നിവര്‍ക്കാണ് നേട്ടം.


റോവിംഗിലും രണ്ട് വെങ്കലം. പുരുഷന്മാരുടെ ഫോര്‍ ഇനത്തില്‍ ജസ്വീന്ദര്‍ സിംഗ്, ഭീം സിംഗ്, പുനിത് കുമാര്‍, ആശിഷ് എന്നിവരും ക്വാര്‍ഡ്രാപ്പിള്‍ സ്‌കള്‍സില്‍ സത്‌നാം സിംഗ്, പര്‍മീന്ദര്‍ സിംഗ്, ജാഖര്‍ ഖാന്‍, സുഖ്മീത് സിംഗ് എന്നിവരും മെഡലിലേക്ക് പങ്കായമെറിഞ്ഞു.രണ്ട് സ്വര്‍ണം, മൂന്ന് വെള്ളി, ആറു വെങ്കലമുള്‍പ്പടെ 11 മെഡലുകളുമായി ഇന്ത്യ ആറാം സ്ഥാനത്താണ്. 39 സ്വര്‍ണമുള്‍പ്പടെ 69 മെഡലുകളുമായി ആതിഥേയരായ ചൈനയാണ് ഒന്നാം സ്ഥാനത്തുള്ളത്.