ലോകത്തെ ആദ്യ പത്ത് സന്തുഷ്ട രാജ്യങ്ങളുടെ ലിസ്റ്റില്‍ ഇടംപിടിച്ചതെല്ലാം മഞ്ഞുമൂടിയ രാഷ്ട്രങ്ങള്‍
തണുപ്പും സന്തോഷവുമായി എന്തോ ചില ബന്ധമുണ്ടെന്നു തോന്നുന്നു. ലോകത്തെ സന്തുഷ്ട രാജ്യങ്ങളില്‍ ആദ്യപത്തില്‍ ഇടംപിടിച്ചതെല്ലാം മഞ്ഞുമൂടിയ രാഷ്ട്രങ്ങള്‍. 156 രാജ്യങ്ങളെ ഉള്‍പ്പെടുത്തി തയ്യാറാക്കിയ 2018-ലെ വേള്‍ഡ് ഹാപ്പിനസ് റിപ്പോര്‍ട്ടില്‍ അത്തരമൊരു സൂചന നല്‍കുന്നു. 2015/17 കാലയളവിലെ റാങ്കിങ്ങാണ് ഇപ്പോള്‍ പുറത്തുവിട്ടിട്ടുള്ളത്.
ആറ് ഘടകങ്ങളെ അടിസ്ഥാനമാക്കിയാണ് ഹാപ്പിനസ് നിര്‍ണയിച്ചിട്ടുള്ളത്. മൊത്ത ആഭ്യന്തര ഉദ്പാദനം, ആയുര്‍ദൈര്‍ഘ്യം, സൗഹാര്‍ദം, സാമൂഹിക പിന്തുണ, സ്വാതന്ത്ര്യം, അഴിമതി എന്നിവയാണ് ആ ഘടകങ്ങള്‍. ഐക്യരാഷ്ട്ര സഭയുടെ സസ്‌റ്റെയ്‌നബിള്‍ ഡവലപ്‌മെന്റ് സൊല്യൂഷന്‍സ് നെറ്റ്വര്‍ക്കാണ് ഈ പട്ടിക തയ്യാറാക്കിയിട്ടുള്ളത്. ഇതാദ്യമായി 117 രാജ്യങ്ങളിലെ കുടിയേറ്റക്കാരുടെ സന്തുഷ്ടികൂടി പട്ടിക തയ്യാറാക്കാനായി അടിസ്ഥാനപ്പെടുത്തിയിട്ടുണ്ട്.
പട്ടികയനുസരിച്ച് ഫിന്‍ലന്‍ഡാണ് ലോകത്തേറ്റവും സന്തോഷമുള്ള രാജ്യം. നോര്‍ദിക് മേഖലയിലെ അയല്‍ക്കാരായ നോര്‍വേയെ പിന്തള്ളിയാണ് ഫിന്‍ലന്‍ഡ് ഒന്നാം സ്ഥാനത്തേക്ക് കയറിയത്. ആദ്യപത്തിലുള്ള രാജ്യങ്ങളില്‍ നാലെണ്ണമൊഴികെയെല്ലാം വടക്കന്‍ യൂറോപ്യന്‍ രാജ്യങ്ങളാണ്. ഡെന്മാര്‍ക്ക്, ഐസ്ലന്‍ഡ്, സ്വിറ്റ്‌സര്‍ലന്‍ഡ്, നെതര്‍ലന്‍ഡ്‌സ്, കാനഡ, ന്യൂസീലന്‍ഡ്, സ്വീഡന്‍, ഓസ്‌ട്രേലിയ എന്നിവയാണ് ആദ്യ പത്തിലെ മറ്റുരാജ്യങ്ങള്‍.
കഴിഞ്ഞവര്‍ഷത്തേക്കാള്‍ നാല് സ്ഥാനങ്ങള്‍ നഷ്ടപ്പെടുത്തിയ അമേരിക്ക പതിനെട്ടാം സ്ഥാനത്താണ്. ബ്രിട്ടന്‍ പത്തൊമ്പതാം സ്ഥാനത്തും യുണൈറ്റഡ് അറബ് എമിറേറ്റ്‌സ് ഇരുപതാം സ്ഥാനത്തും. ഏഷ്യയില്‍ സന്തോഷത്തില്‍ ഒന്നാം സ്ഥാനത്തുനില്‍ക്കുന്നത് യു.എ.ഇയാണ്. ഖത്തര്‍ മുപ്പത്തിരണ്ടാം സ്ഥാനത്തും സൗദി അറേബ്യ മുപ്പത്തിമൂന്നാം സ്ഥാനത്തും സിംഗപ്പുര്‍ മുപ്പത്തിനാലാം സ്ഥാനത്തുമുണ്ട്. റിപ്പോര്‍ട്ടനുസരിച്ച് ഇന്ത്യയിലെ ജനങ്ങള്‍ അത്രകണ്ട് ആഹ്ലാദവാന്മാരല്ല. നൂറ്റി മുപ്പത്തിമൂന്നാം സ്ഥാനത്താണ് ഇന്ത്യ. എന്നാല്‍, പാക്കിസ്ഥാനാകട്ടെ, എഴുപത്തിയഞ്ചാം സ്ഥാനത്തും.
കഴിഞ്ഞവര്‍ഷം നൂറ്റിയിരുപത്തിരണ്ടാം സ്ഥാനത്തായിരുന്നു ഇന്ത്യ. പാക്കിസ്ഥാന്‍ കഴിഞ്ഞവര്‍ഷത്തെ എണ്‍പതാം സ്ഥാനത്തുനിന്ന് അഞ്ചുസ്ഥാനങ്ങള്‍ മെച്ചപ്പെടുത്തുകയും ചെയ്തു. ഇന്ത്യയുടെ അയല്‍രാജ്യങ്ങളില്‍ ഭൂട്ടാന്‍ തൊണ്ണൂറ്റിയെഴാം സ്ഥാനത്തും നേപ്പാള്‍ നൂറ്റിയൊന്നാം സ്ഥാനത്തും ബംഗ്ലാദേശ് നൂറ്റിപതിനഞ്ചാം സ്ഥാനത്തും ശ്രീലങ്ക നൂറ്റിപതിനാറാം സ്ഥാനത്തും നില്‍ക്കുന്നു. എണ്‍പത്തിയാറാം സ്ഥാനത്തുള്ള ചൈനയും ഇന്ത്യയെക്കാള്‍ ഏറെ മുന്നിലാണ്.
മലാവി, ഹെയ്ത്തി, ലൈബീരിയ, സിറിയ, റുവാന്‍ഡ, യെമന്‍, ടാന്‍സാനിയ, സൗത്ത് സുഡാന്‍, സെന്‍ട്രല്‍ ആഫ്രിക്കന്‍ റിപ്പബ്ലിക്, ബറൂണ്ടി എന്നിവയാണ് അല്‍പം പോലും സന്തുഷ്ടരല്ലാത്ത ജനതയുള്ള അവസാന പത്ത് രാജ്യങ്ങള്‍. ഇവിടങ്ങളിലെല്ലാം ആഭ്യന്തര കലാപവും ഭീകരതയും തീവ്രവാദ പ്രസ്ഥാനങ്ങളും ശക്തമാണെന്ന് റിപ്പോര്‍ട്ടില്‍ പറയുന്നു. അഴിമതിയും കുറ്റകൃത്യങ്ങളും പട്ടിണിയും ജനജീവിതം തീര്‍ത്തും ദുസ്സഹമാക്കിയ രാജ്യങ്ങളാണ് ഇവയൊക്കെ.
https://www.facebook.com/Malayalivartha
