കരസേനയിൽ സൗജന്യമായി ബി.ടെക്. പഠിക്കാം. ലെഫ്റ്റനന്റ് പദവിയിൽ ജോലിയും നേടാം. 2018 ജനവരിയിൽ ആരംഭിക്കുന്ന പ്ലസ്ടു മെക്കാനിക്കൽ എൻട്രി സ്കീമിന്റെ 38 -ാമത് കോഴ്‌സിലേക്ക് അപേക്ഷ ക്ഷണിച്ചു.
യോഗ്യത
ഹയർസെക്കൻഡറി/തുല്യ ബോർഡ് പരീക്ഷയിൽ ഫിസിക്സ്, കെമിസ്ട്രി, മാത്തമാറ്റിക്സ് വിഷയങ്ങൾക്ക് മൊത്തം 70 ശതമാനം മാർക്കോടെ വിജയിച്ചിരിക്കണം. ഉയരം 157.5 സെ.മീറ്റർ. മികച്ച ആരോഗ്യം. വൈകല്യങ്ങൾ പാടില്ല. അവിവാഹിതരായ ആൺകുട്ടികൾമാത്രം അപേക്ഷിച്ചാൽ മതിയാകും.
പ്രായം 2018 ജനവരി ഒന്നിന് പതിനാറരയ്ക്കും പത്തൊമ്പതരയ്ക്കും മധ്യേ. 1998 ജൂലായ് ഒന്നിന് മുമ്പോ 2001 ജൂലായ് ഒന്നിന് ശേഷമോ ജനിച്ചവരാകരുത്.
യോഗ്യതാ പരീക്ഷയുടെ മികവിനെ അടിസ്ഥാനമാക്കി സർവീസ് സെലക്ഷൻ ബോർഡ് (SSB) അഭിമുഖം നടത്തും. അഞ്ച് ദിവസം നീളുന്ന അഭിമുഖത്തിൽ സൈക്കോളജിക്കൽ/ഇന്റലിജൻസ് ടെസ്റ്റ്, ഗ്രൂപ്പ് ടെസ്റ്റുകൾ എന്നിവ ഉൾപ്പെടും. ആദ്യ ദിവസത്തെ സൈക്കോളജിക്കൽ ടെസ്റ്റിൽ യോഗ്യത നേടുന്നവരെയാണ് തുടർന്നുള്ളതിലും പങ്കെടുപ്പിക്കുക.
ഓഫീസേഴ്‌സ് ട്രെയിനിങ് അക്കാദമിയിൽ പരിശീലനം.
അഞ്ച് വർഷമാണ് പരിശീലനം. ഒന്നാമത്തെ വർഷം അടിസ്ഥാന മിലിട്ടറി പരിശീലനം ഗയയിലുള്ള ഓഫീസർ ട്രെയിനിങ് അക്കാദമിയിൽ നൽകും. തുടർന്ന് മൂന്നുവർഷം ടെക്‌നിക്കൽ ട്രെയിനിങ്. ഈ കാലയളവിലാണ് ബി.ടെക്. പഠനവും പരിശീലനങ്ങളും. പരിശീലന കാലം 21,000 രൂപ പ്രതിമാസം സ്റ്റൈപ്പൻഡ്‌ ലഭിക്കും. നാലുവർഷത്തെ പഠനപരിശീലനങ്ങൾ വിജയകരമായി പൂർത്തിയാക്കുന്നവർക്ക് പെർമനന്റ് കമ്മീഷനിലൂടെ ലഫ്റ്റനന്റ് പദവിയിൽ ജോലിയും ലഭിക്കും.
വിവരങ്ങൾക്ക്: www.joinindianarmy.nic.in.