സംസ്ഥാനത്തെ സര്‍ക്കാര്‍/എയിഡഡ് എന്‍ജിനീയറിംഗ് കോളേജുകളിലും സര്‍ക്കാര്‍ നിയന്ത്രിത സ്വാശ്രയ കോളേജുകളിലും മറ്റും ഇക്കൊല്ലം നടത്തുന്ന രണ്ടുവര്‍ഷത്തെ ഫുള്‍ടൈം എംടെക് കോഴ്‌സ് പ്രവേശനത്തിന് ഇപ്പോൾ അപേക്ഷിക്കാം. ജൂൺ 12 വരെ ഓൺലൈൻ ആയി അപേക്ഷിക്കാം. തിരുവനന്തപുരം കോളേജ് ഓഫ് എന്‍ജിനീയറിംഗിനാണ് (CET) അഡ്മിഷന്‍ നടപടികളുടെ ചുമതല. സാങ്കേതിക വിദ്യാഭ്യാസ വകുപ്പിന്റെ മേല്‍നോട്ടത്തിലാണ് പ്രവേശനം.
സര്‍ക്കാര്‍ മേഖലയില്‍ പത്തും എയിഡഡ് മേഖലയില്‍ മൂന്നും സര്‍ക്കാര്‍ നിയന്ത്രിത സ്വാശ്രയമേഖലയില്‍ പതിനേഴും എന്‍ജിനീയറിംഗ് കോളേജുകള്‍ നടത്തുന്ന ഫുള്‍ടൈം എംടെക് കോഴ്‌സുകളിലേക്കാണ് ഇപ്പോള്‍ അപേക്ഷകള്‍ ക്ഷണിച്ചിരിക്കുന്നത്. കോഴ്സിനെ സംബന്ധിച്ച എല്ലാ വിവരങ്ങളും www.dtekerala.gov.in എന്ന വെബ്‌സൈറ്റില്‍ ലഭ്യമാണ്.
യോഗ്യത: 60% മാര്‍ക്കില്‍ കുറയാത്ത ബിഇ/ബിടെക്/തത്തുല്യ ബിരുദമുള്ളവര്‍ക്ക് അപേക്ഷിക്കാവുന്നതാണ്. SEBC കാര്‍ക്ക് 54% മാര്‍ക്ക് മതി. പട്ടികജാതി/വര്‍ഗ്ഗക്കാര്‍ക്ക് മിനിമം പാസ് മാർക്ക് മതിയാകും. പ്രാബല്യത്തിലുള്ള 'ഗേറ്റ്' സ്‌കോര്‍ ഉണ്ടായിരിക്കണം. അപേക്ഷാഫീസ് 500 രൂപ. SC/ST കാര്‍ക്ക് 100 രൂപ. അപേക്ഷ ഓണ്‍ലൈനായി www.dtekerala.gov.in അല്ലെങ്കില്‍ www.cet.ac.in എന്ന വെബ്‌സൈറ്റിലൂടെ അപേക്ഷിക്കാം.
അപേക്ഷയുടെ പ്രിന്റൗട്ട് ബന്ധപ്പെട്ട രേഖകള്‍ സഹിതം തിരുവനന്തപുരം CET പ്രിന്‍സിപ്പലിന് ജൂണ്‍ 16നകം ലഭിക്കേണ്ടതാണ്. സീറ്റ് അലോട്ട്‌മെന്റ് ജൂലായ് 7ന് ആരംഭിക്കും. സ്വകാര്യ സ്വാശ്രയ കോളേജുകളിലെ 50% മെരിറ്റ് സീറ്റുകളിലെ പ്രവേശനവും സാങ്കേതിക വിദ്യാഭ്യാസവകുപ്പ് തയ്യാറാക്കുന്ന റാങ്ക് ലിസ്റ്റില്‍ നിന്നായിരിക്കും.